सुदूरपश्चिमका १३ जनाको स्वाब नमूना परीक्षणका लागि काठमाडौं पठाइयो

१४ चैत, काठमाडौं । सुदूरपश्चिमका कोरोना भाइरस संक्र्रमणको आशंका गरिएका १३ जनाको स्वाब नमूना संकलन गरी परीक्षणका लागि काठमाडौं पठाइएको छ । कैलालीको धनगढीमा रहेको सुदूरपश्चिम प्रदेश प्रयोगशालामा विभिन्न प्रदेशका जिल्लाबाट संकलन गरी पठाइएको १३ वटा नमूना परीक्षणका आएकोमा ती सबै थ्रोट स्वाब टेकुस्थित राष्ट्रिय जनस्वास्थ्य प्रयोगशाला पठाइएको प्रदेश प्रयोगशालाकी निमित्त निर्देशक अस्मिता सापकोटाले जानकारी दिएका छन् ।

उनका अनुसार सेती प्रादेशिक अस्पतालमा संकलित आठ, महाकाली अस्पतालबाट पठाइएका दुई, बैतडी जिल्ला अस्पतालका दुई र डोटी जिल्ला अस्पतालबाट पठाइएको एक गरी १३ को नमूना परीक्षणका लागि काठमाडौं प्रयोगशालामा पठाइएको हो । कोभिड १९ फैलिन नदिन सरकारले लकडाउन लागू गरेसँगै हवाई सेवा समेत बन्द भएकाले सुदूरपश्चिम प्रदेशबाट नमूना परीक्षणका लागि गाडीमार्फत काठमाडौं पठाइएको छ । उनले नमूना परिक्षणको रिपोर्ट आउन दुई तीन दिन लाग्ने बताएका छन् ।

हाल अलग्गै आइसोलेसनमा राखेर उनीहरूको उपचार भइरहेको छ । प्रदेश प्रयोगशालाले सुदूरपश्चिमबाट यसअघि पठाइएका १४ वटा नमूना परीक्षण गर्दा सबैजनाको रिपोर्ट नेगेटिभ आएको जनाएको छ । कोभिड १९ को परिक्षण गर्न सुदूरपश्चिममा प्रयोगशाला छैन ।

यस्तै सुदूरपश्चिमका मठमन्दिरमा पशुबली चढाउन निषेध गरिएको छ । बैतडीका प्रमुख जिल्ला अधिकारी आनन्द पौडेलले बिहिबार बसेको बैठकले कोरोना नियन्त्रणका लागि मठमन्दिरमा भिडभाड नगर्नेदेखि पशु बली चढाउन समेत निषेध गर्ने निर्णय भएको जानकारी र्दिएका छन् । चैते दशैंका बेला बली चढाउने चलन भएकाले टाढाटाढाबाट बलीका लागि पशु ल्याइएको भए पनि सुरक्षा निकायले त्यसलाई निषेध गर्ने बताएको छ ।