राहत प्याकेज ल्याउन देउवाको आग्रह

१४ चैत्र, काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले दैनिक ज्याला गरेर जीवन निर्वाह गरिरहेका नागरिकलाई राहत पुग्ने गरी तत्काल राहत प्याकेजको घोषणा गर्न सरकारलाई आग्रह गरेका छन् ।

पार्टीका तर्फबाट आज एक विज्ञप्ति जारी गर्दै सभापति देउवाले लकडाउनबाट सबैभन्दा मर्का परेको वर्ग भनेको दैनिक ज्यालादारी गर्नेहरुलाई राहत पुग्ने खालको राहत प्याकेज ल्याउन सरकारको ध्यानाकर्षण गराएका हुन् । सो वर्गलाई सरकारले तोकेको न्यूनतम ज्याला दर भन्दा कम नहुने गरी राहतको प्याकेज ल्याउन आग्रह गर्दछु – विज्ञप्तिमा भनिएको छ ।

साथै न्यून आय भएका श्रमिक, बेरोजगार युवा तथा शहरी क्षेत्रमा बसोबास गर्ने न्यून आय भएकाहरुका लागि राहत पुग्ने योजना तथा कार्यक्रम बनाउन समेत सभापति देउवाले आग्रह गरेका छन् । यसैगरी २० लाखसम्म ऋण लिएका साना व्यावसायीको लागि तीन महिना सम्पूर्ण व्याज मिनाहा गर्न त्यसपछि पनि निश्चित अवधिका लागि ब्याजदर घटाउन माग गरिएको छ ।