पर्याप्त किट र पीपीई रहेको सरकारकाे दावी

१४ चैत्र, काठमाडौं । कोरोना भाइरस परीक्षण गर्ने किट र चिकित्सकले व्यक्तिगत सुरक्षाका लागि लगाउने पीपीईको अभाव नरहेको सरकारले दावी गरेको छ । स्वास्थ्य तथा जनसंख्या मन्त्रालयमा आज गरिएको नियमित पत्रकार सम्मेलनमा सरकारी पदाधिकारीले यस्तो दावी गरेका हुन् ।

मन्त्रालयका प्रवक्ता डा. विकास देवकोटाले विभिन्न सञ्चारमाध्यममा आएको खबरलाई असत्य सावित गर्ने गरी यस्तो दावी गरेका हुन् । हामीसँग कोरोना परीक्षण गर्न चाहिने किटको अभाव छैन भन्दै उनले पीपीईको पनि मौज्दात रहेको दावी गरे । प्रवक्ता डा. देवकोटाका अनुसार, कोरोना परीक्षण गर्न राजधानीमा नै ६ वटा हब अस्पताल तोकेका छौं र त्यहाँ आवश्यक किट र पीपीई पठाइएको छ ।

साथै राजधानी बाहिर पनि विभिन्न ७८ वटा अस्पताललाई कोरोना परीक्षणका लागि तयारी अवस्थामा राखेको जानकारी उनले दिएका छन् । पत्रकार सम्मेलनमा उपस्थित भएका स्वास्थ्यमन्त्री भानुभक्त ढकालका सल्लाहकार डा.खेम कार्कीले कोरोनाबाट बच्न सकेसम्म भेटघाट नगर्न र गर्नै परे अंग्रेजी अक्षरको एल आकारमा बसेर मात्र गर्न सुझाव दिए । एल आकारमा बसेर कुरा गर्दा संक्रमण फैलने सम्भावना न्यून हुने पनि उनले बताएका छन् ।

कोरोना फैलने सबैभन्दा सजिलो माध्यम भनेको थुक हो भन्दै उनले एल आकारमा बसेर कुरा गर्दा थुकको छिटा पर्ने सम्भावना कम हुन्छ – डा. कार्कीले भने । साथै उपभोग्य सामग्री लिन पटक पटक जानुको सट्टा एकैपटक गए राम्रो हुने सल्लाह दिंदै डा. कार्कीले भने– यसरी सामान किन्दा कम्तिमा एक मिटरको दूरी कायम गर्नुपर्ने छ ।