महानगरपालिकाद्धारा पाँच विपन्न परिवारलाई खाद्यान्न वितरण

१५ चैत, काठमाडौं । काठमाडौँ महानगरपालिका–१६ एकलटारमा बस्दै आएका पाँच विपन्न परिवारलाई खाद्यान्न वितरण गरिएको छ । न्यूरोडमा व्यवसाय गर्दै आउनुभएका विवेक शर्माले आज नागार्जुन एकलटार पुगेर खानाको अभावमा बसेका पाँच विपन्न परिवारलाई खाद्यान्न वितरण गरेका छन् ।

उहाँले तीन/तीन जनाको पाँच परिवारलाई प्रति परिवार दश किलोग्राम चामल, दुई किलोग्राम दाल, एक किलोग्राम नुन, आधा लिटर तेल, दुई किलोग्राम आलु र एक पाकेट साबुन वितरण गरेका छन् । शर्माले ‘मिसन अन्नपूर्ण’ भन्ने अभियानमार्फत उनीहरुलाई सहयोग गरेका छन् । “खानाको अभावले कोहीपनि नेपाली भोकभोकै नमरोस् भन्ने उदेश्यले अभियान सञ्चालन गरेको हुँ”, उनले भने ।

उनले काठमाडौँ, भक्तपुर र ललितपुरमा बस्ने जोकोही खानाको अभाव भए फोन गर्न आग्रह समेत गरेका छन् । विश्वव्यापी रुपमा फैलँदै गएको नोबेल कोरोना भाइरस (कोभिड–१९) को नेपालमा सम्भावित सङ्क्रमणका कारण सरकारले चैत ११ गते बिहानदेखि १८ सम्म ‘लकडाउन’ गरेपछि दैनिक मजदूरी गरेर पेट पाल्दै आएका विपन्न परिवारलाई खानाको अभाव हुँदै आएको छ ।