सङ्क्रमणबाट उन्मुक्तिका लागि सामाजिक दूरी कायम राख्न मुख्यमन्त्रीको आग्रह

१६ चैत, काठमाडौं । प्रदेश नं २ का मुख्यमन्त्री लालबाबु राउतले कोरोना भाइरसको सङ्क्रमणबाट उन्मुक्तिका लागि सामाजिक दूरी कायम राख्न प्रदेशवासीमा आग्रह गरेका छन् । उनले आज प्रदेशवासीमा अपिल गर्दै विपद् जित्न सबैको सहयोगको खाँचौ औँल्याएका छन् ।

कोरोना भाइरसको सङ्क्रमणको सङ्कटको घडीमा सङ्घीय सरकारद्वारा जारी लकडाउनलाई सफल पार्न आग्रह गर्दै उनले महामारीको यस सङ्कटमा प्रदेश सरकारले हरेक किसिमको सहयोग गर्न कुनै पनि कसर बाँकी नराख्ने बताएका छन् ।

मुख्यमन्त्री राउतले अपिलमा भनेका छन्, “यो सङ्कटको घडीमा मुक्ति दिलाउन प्रदेश सरकार प्रदेशवासीको साथमा छ, प्रदेशवासीसँग उभिएको छ ।” प्रदेश सरकारले आफ्नो स्तरबाट विभिन्न ठाउँमा क्वारेन्टाइन, आइसोलेसन वार्ड स्थापना गरिसकेको उल्लेख गर्दै उनले कोरोना परीक्षणका लागि अस्पतालहरुमा साधनस्रोत जुटाउन लागि परेको बताएका छन् ।