आज ‘लकडाउन’को सातौँ दिन, बिहानै ८४ वटा गाडी नियन्त्रणमा

१७ चैत्र, काठमाडौं । कोरोना भाइरस रोकथाम र नियन्त्रणका लागी सरकारले लागु गरेको ‘लकडाउन’को सातौँ दिन सोमबार पनि अत्यावश्यक बाहेकका गाडी चलाउन रोक लगाइएको छ । यस्तै लकडाउनको उल्लङ्घन गरी घरबाहिर निस्कनेलाई प्रहरीले केही समय नियन्त्रणमा लिएर छाडेको छ ।

सोमबार बिहानै काठमाडौंबाट ६ सय ५४ जना, ललितपुरबाट ६८ जना र भक्तपुरबाट १८ जना गरी सात सय ४० जनालाई नियन्त्रणमा लिइएको प्रहरीले जनाएको छ । उनीहरुलाई केही समय नियन्त्रणमा लिएर जताबाट आएको उतै फर्काइएको प्रहरीले जनाएको छ । यसैगरी प्रहरीले सोमबार बिहानै पनि ८४ वटा गाडीलाई पनि नियन्त्रणमा लिएको छ । नियन्त्रणमा लिइएको गाडी बेलुकीमात्रै छाडिनेछ ।

विश्वव्यापी रुपमा फैलिएको कोरोना भाइरस ‘कोभिड-१९’ को सङ्क्रणबाट बच्न सरकारले गएको मङ्गलबारदेखि साताव्यापी लकडाउन घोषणा गरेको थियो । कोरोनाको सङ्क्रमण फैलिरहेकोले सोमबार बसेको बैठकले थप आठ दिन लकडाउनलाई निरन्तरता दिने निर्णय गरेको छ ।