अमेरिकी नागरिकलाई फिर्ता लैजान कतार एयरवेज आउने

१७ चैत्र, काठमाडौं । नेपालमा रहेका अमेरिकी नागरिकलाई फिर्ता लैजान मंगलबार जहाज आउने भएको छ । यो जहाज काठमाडौंबाट दोहा हुँदै वासिंटन डिसीस्थित डल्लास एयरपोर्ट पुग्ने अमेरिकी दूतावासले जनाएको हाे ।

नेपालमा रहेको अमेरिकी दूतावासका अनुसार चार्टर्ड गरेको कतार एअरवेजको जहाज ३१ मार्च अर्थात् मङ्गलबार नेपाल आइपुग्ने भएको छ । नेपालबाट उडानको समय १२ बजेलाई तय गरिएको छ । कतार एयरवेजको जहाज काठमाडौंबाट दोहा हुँदै अमेरिकाको डल्लास एअरपोर्ट पुग्नेछ ।

आफ्ना नागरिक लैजान अर्को चार्टर्ड उडानको पनि तयारी गरेको अमेरिकी दूतावासले जनाएको छ । यस्तै नेपालका विभिन्न स्थानमा रहेका अमेरिकी नागरिकलाई नेपाल पर्यटन बोर्डको सहकार्यमा काठमाडाैं ल्याउने काम भइरहेको पनि दूतावासले जनाएको छ । यसअघि युरोपेली देशले पनि कतार एअरवेजमार्फत आफ्ना नागरिक स्वदेश लगिसकेका छन् ।