कारोना सङ्क्रमण फैलिन सक्ने भन्दै कारागारबाट छाडिए चार कैदी

१७ चैत, सप्तरी । कोभिड–१९ को सङ्क्रमण फैलिन सक्ने सम्भावनालाई मध्यनजर गर्दै राजविराजस्थित कारागारबाट चार कैदीबन्दीलाई छाडिएको छ ।

जिल्ला अदालतको आदेश बमोजिम एक वर्षभन्दा कम समयको कैद सजाय पाएका चार कैदीबन्दीलाई छाडिएको राजविराज कारागारका जेलर सत्यनारायण यादवले जानकारी दिएका छन् । छाडिएकाहरु बहुबिवाह र कुटपिट मुद्दाका आरोपित हुन ।

कोरोनाको सम्भावित जोखिम न्यूनीकरणका लागि अदालतले एक वर्षभन्दा कम समयको कैद सजाय पाएका कैदीबन्दीलाई भुक्तान गर्न बाँकी रहेको समयबापतको रकम तिराएर छाड्न दिएको आदेशानुसार ती कैदीबन्दीलाई छाडिएको जेलर यादवले बताएका छन् । कूल १२५ जना क्षमता रहेको कारागारमा हाल एक बालक र १६ महिलासहित २३३ कैदीबन्दी छन् ।