कोरोना रोकथामका नाममा जथाभावी रसायन नछर्न आग्रह

२० चैत, बाँके । कोरोना भाइरस रोकथामका नाममा जथाभावी रसायन नछर्न नेपालगञ्ज उपमहानगरपालिकाले आग्रह गरेको छ । उपमहानगरपालिका भित्रका स्थानमा विनाजानकारी जथाभावी रसायनहरु छर्ने कार्य भएपछि उपमहानगरपालिका वा सम्वन्धित निकायमा सम्बन्धितलाई समन्वय गर्न आग्रह गरिएको स्वास्थ्य शाखा प्रमुख रामबहादुर चन्दले बताएका छन् ।

उनका अनुसार, नेपालगञ्ज उपमहानगरपालिकाभित्रका केही सङ्घ संस्था तथा व्यक्तिहरुले वडा, नगर तथा टोललाई सेनिटाइज्ड गर्न मापदण्ड नपुगेका रसायन छरेको पाइएको छ । मापदण्ड नपुगेका इन्सेक्टिसाइट, पेन्सीसाइट लगायतका विभिन्न रसायन छर्किदा जीवजन्तु, वातावरण तथा मानवीय स्वास्थ्यमा समेत असर पर्ने हुँदा सम्बन्धित सरोकारवाला निकायसँग समन्वय गरी काम गर्न भनिएको चन्दले जानकारी दिएका छन् ।

१० जना घर फिर्ता

बाँकेका विभिन्न स्थानमा स्थापना गरिएका क्वारेन्टाइनमा २ सय १२ जनालाई राखिएको छ भने क्वारेन्टाइनमा राखेर ‘थ्रोट स्वाव’ परीक्षण गरी ‘नेगेटिभ’ रिपोर्ट आएका १० जनालाई घर पठाइएको छ । जिल्लाका ८ वटै स्थानीय तहमा विभिन्न १३ स्थानमा क्वारेन्टाइन स्थापना गरिएको स्वास्थ्य कार्यालय बाँकेका फोकल पर्सन नरेश श्रेष्ठले जानकारी दिएका छन् । उनका अनुसार बाँकेमा हाल ४ सय ४९ जना अट्ने क्वारेन्टाइनको क्षमता रहेको छ । जसमध्ये ३४४ बेड तयार भएको छ ।

नेपालगञ्ज उपमहानगरपालिकाअन्तर्गत महेन्द्र बहुमुखी क्याम्पसमा निर्माण गरिएको क्वारेन्टाईनमा १००, कोहलपुर नगरपालिकाको कृषि तालिम केन्द्रमा ३२, खजुरा गाउँपालिकास्थित मैटहवा माविमा ५३ र कृषि तालिम केन्द्रमा १५, जानकी गाउँपालिकाको नेपाल राष्ट्रिय प्राविमा २५, बैजनाथ गाउँपालिकाको बनकटुवा प्राथमिक स्वास्थ्य केन्द्रमा १६ जना रहेका छन् ।