गल्याङमा चार सय ९५ परिवारका १८ सय ५४ जनालाई राहत वितरण

२३ चैत, गल्याङ । स्याङ्जाको गल्याङ नगरपालिकाले चार सय ९५ परिवारलाई राहत बाँडेको छ । गल्याङ नगरपालिका वडा नम्बर एक, दुई, तीन र चारमा लकडाउनका कारण समस्यामा परेका अति विपन्न चार सय ९५ परिवारलाई राहत बाँडिएको हो ।

शनिबार बेलुकासम्ममा चार सय ९५ परिवारका एक हजार आठ सय ५४ जनालाई राहत बाँडिएको नगरप्रमुख भुपराज अधिकारीले जानकारी दिए । उनीहरुलाई चार वटै वडामा गरी हालसम्म नौ हजार दुई सय ७० किलो चामल बाँडिएको छ । यस्तै, पाँच सय ५१ किलो दाल, ४९७ किलो नुन, चार सय ७६ लिटर खाने तेल र चार सय ६७ वटा हात धुने साबुन बाँडिएको प्रमुख प्रशासकीय अधिकृत इश्वरीप्रसाद पाण्डेले जानकारी दिए । राहतका लागि आइतबार वडा नम्बर पाँचमा जाने तय भएको उनले जानकारी दिए । राहत वितरणका लागि वडा वडामा पुगेका नगरप्रमुख भुपराज अधिकारीले नगरपालिकाले बनाएको राहत मापदण्ड अनुसार विपन्नहरुलाई राहत बाँडिएको स्पष्ट पारे ।

वडा नम्बर चारमा भएको कार्यक्रममा उनले भने –“कोरोना भाइरसको संक्रमणबाट साबधानी अपनाउनका लागि लकडाउन भएको अवस्था छ । यो विपदको समयमा नगरपालिकाले पिडामा परेकाहरुलाई सहयोग गरेको हो ।” नगरप्रमुख अधिकारीले सबै नगरबासीको अभिभावकत्व नगरपालिकाले लिने भन्दै ढुक्क हुन आग्रह पनि गरे । उनले भने –“तपाईहरु साबधानी अपाउनुहोला । हामी जनप्रतिनिधि र कर्मचारी सक्दो प्रयास गरिरहेका छौं” पहिलो चरणमा १५ दिनको लागि राहत प्याकेज ल्याएको भन्दै उनले राहत प्याकेजलाई लकडाउन सकिएको एक हप्तासम्म जारी राख्ने जानकारी दिए । नगरपालिकाबाट राहत र कोरोना भाइरस संक्रमणको जोखिम कमगर्नका लागि ३० लाख रुपैयाँ बजेट विनियोजन गरेको पनि जानकारी दिए ।