अब नेपाली सेनालाई देश चलाउन दिने कि ?

♦ सञ्चिता पौड्याल

२३ चैत्र, काठमाडौं । अहिले नेपालमा ९ जनामा कोरोना भाइरसको संक्रमण देखिएको छ । अझै डरलाग्दो कुरा त के भने नेपालमा कोरोना संक्रमणको दोश्रो स्टेज अर्थात लोकल ट्रान्समिसन देखिएको छ । कोरोना देखिएको मध्य ८ जना विदेशबाट आएका नेपाली नागरिक हुन् भने बाँकी १ जनामा भने नेपालभित्रै कोरोना संक्रमण देखिएको छ ।

हाम्रो छिमेकी मुलुक भारतमा कोरोना संक्रमण बढ्दो छ । प्रविधिमा हामी भन्दा धेरै माथि रहेको अमेरिकाले कोरोना भाइरससँग लड्न सकेको छैन भने हामी बेलैमा सचेत भएनौ भने अवस्था अझ डरलाग्दो हुनसक्छ । यस्तो डरलाग्दो अवस्थामा देशलाई माया गर्नुको साटो नेपाली नेताहरु भने कसरी आफु धनी हुने भनेर लागेका छन् । अरु देशहरु कोरोना संक्रमणले निकै चिन्तित भएको बेला नेपाली नेताहरु भने कोरोना रोकथाम गर्ने औषधी खरिदमा भ्रष्टाचार गर्ने तर्फ लागेका छन् ।

सरकारले कोरोना भाइरस (कोभिड १९) को उपचारका लागि चाहिने पीपीई, मास्क लगायतका स्वास्थ्य सामग्रीमा करोडौं भ्रष्टाचार गर्न खोज्ने नेपाल सरकारलाई हजार मुख भएका शेषनागले त वर्णन गर्द सक्दैन थिए होलान । संसारमा सबै भन्दा डरलाग्दो भ्रष्ट्राचारको घटना भनेर कसैले भन्छ भने यो नै हुनु पर्छ । कोरोन संक्रमणको बेला ल्याउन लागेको स्वास्थ्य सामाग्रीमा कसैले आँखा लाउँछ भने त्यो भन्दा ठूलो भ्रष्ट्राचारको स्वरुप अर्को कुनै सक्दैन । विदेशतिर कोरोनाले देश खतम बनाउँदै लग्यो भन्दै सरकार निकै चिन्तित हुन्छन् तर यहाँ भने कोरोना आयो खाउँला पिउँला भन्दैछन् ।

स्वास्थ्य मन्त्रालय र त्यहाँका उच्च तहका कर्मचारीमा कोरोना प्रकोपको बेलामा औषधी खरिद गर्नसक्ने दम रहेनछ । विदेश यात्रा गर्न पाएको भए एकदिन अघि नै हस्ताक्षर गर्ने प्रशासन आज जनताको स्वास्थ्यसँग जोडिएको विषयमा निर्णय गर्न सक्दैन । यस्तो बेलामा पनि स्वास्थ्य सामग्री किन्न नसक्ने कर्मचारी के का लागि ? स्वास्थ्य मन्त्रालयले औषधी किन्न नसकेर सेनालाई जिम्मा लगायो ।

कोरोना भाइरसका लागि आवश्यक व्यक्तिगत सुरक्षा उपकरण र अन्य सामानको खरिदका सम्बन्धमा भएको भ्रष्ट्राचारबारे एउटा मिडियामा समाचार आउँछ । प्रधानमन्त्रीका आईटी सल्लाहकार कै कम्पनीले रहेछ त्यो मिडियाको समाचार हटाउने । एउटा सामान्य मान्छेले बुझ्नसक्छ के भयो होला भनेर ? पछि छाती फुलाएर हाम्रो कम्पनीले नै त्यो सूचना मेटेको हो भनेर प्रेस विज्ञप्ति निकाल्छन् । कानुन उनीहरुकै हातमा रहेछ, नभए प्रधानमन्त्रीले आफ्नो सल्लाहकार विरुद्ध कुनै कदम चाल्नु पर्ने हो ? फेसबुकमा केही लेख्दा साइबर क्राइम लाग्ने नेपालमा यस्तो ठुलो प्रकरणमा भने चुप छ राज्य ।

स्मरण रहोस्, नेपाली बैङ्किङ्ग प्रणाली पनि जसले त्यो समाचार मेट्यो उसकै हातमा छ । २७ वाणिज्य बैंक मध्ये २२ वाणिज्य बैंकले सो कम्पनीले बनाएको सफ्टवेयर चलाएका छन् । अब कुनैदिन नेपाली बैङ्किङ्ग प्रणालीमा ठूलो ह्याक हुनसक्छ । सोच्नुस त नेपालको ठूलो बैङ्किङ्ग प्रणाली पनि असुरक्षित छ । राजतन्त्रलाई सामन्ती देखाएर भोट लिएका महान नेताहरुले भन्नु पर्यो कि सामन्ती राजतन्त्रको बेलामा यस्तो भएको थियो ?

स्वास्थ्यमन्त्रीलाई देश र कोरोना प्रति कुनै मतलव नै छैन, उहाँको घरमा पाहुन आएका छन् । उहाँलाई पाहुनाको चिन्ता छ , जनताको चिन्ता छैन । कठै मेरो देश । उहाँलाई पाहुनाको हेर विचार गर्न मात्र मन्त्री बनाईएको रहेछ । पाहुनाको हेरचाह गर्न बरु छुटै पाहुना मन्त्रालय बनाईदिनु नी सरकारले ? कोरोना संक्रमित मुख्य सीमा नाकालाई छलेर अन्त्यत्रबाट नेपाल आए रे ? सरकारको यो भन्दा ठुलो अरु के हुन् सक्छ र ? सीमा सुरक्षाको अवस्था पनि देखियो ?

प्रधानमन्त्री ज्यु, विरामी हुनुहुन्छ, उहाँको शिघ्र स्वास्थ्यलाभको कामना गरौँ । तर आफ्नो वरिपरीको वातावरण सफा गर्नुस प्रधानमन्त्री ज्यू ? वरीपरि गिद्ध धेरै उडे भने बिरामी निको हुँदैन कि उल्टो इन्फेक्सन हुन्छ । समयमै गिद्धलाई हटाउनु होस् नभए प्रधानमन्त्री ज्युको राजनीतिक करियरमा नै इन्फेक्सन होला ?

बिरामी हुँदा जनताको उपचार गर्छौ भनेर खोलिएको निजी अस्पताल देश विरामी हुँदा उनीहरुले उपचार गर्न सक्दैनौ भन्छन ? सामान्य रुघा ज्वरो आउँदा टाउकोदेखि खुटासम्म एक्सरे गर्ने केही महान निजी अस्पतालहरु यस्तो विपतको समयमै कहाँ गए ? यस्तो बेला उपचार गर्न नमान्ने अस्पतालको लाईसेन्स खारेज गरेर त्यो अस्पताललाई राष्ट्रियकरण गर्नुपर्ने होइन ? कि सरकारमा समावेश नेता कै लगानी त छैन निजी अस्पातालमा ?

अहिलेको सरकारको कामले देश ठुलो दुर्घटना फस्ने देखिएको छ ? न काम गर्नसक्ने न कुनै गतिलो ठोस निर्णय गर्नसक्ने ।मरेको व्यक्तिको कात्रोमा समेत आँखा लाउन सक्ने यो सरकारबाट हामीले केही आशा गर्न सक्छौ र ? अहिले यस्तो संक्रमणको बेलामा औषधी किन्न नसकेर सेनालाई जिम्मा लगाउने नेपाल सरकारको काम नै नभएको नभएको प्रस्ट देखिएको छ ? अब बेलैमा यो महामारीबाट जोगिन केही समय नेपाली सेनालाई देश चलाउन दिनु पर्छ । नभए आजसम्म पशुपतिनाथले बचाएको मेरो देश कतिसमय बच्ला र ?