लकडाउनकाे अवज्ञा गर्ने ५ सय ४९ गाडी कारबाहीमा

२४ चैत्र, काठमाडौं । कोरोना भाइरस रोकथाम तथा नियन्त्रणका लागी सरकारले लागु गरेको लकडाउनको अवज्ञा गर्ने सवारी साधनलाई ट्राफिक प्रहरीले कारबाही गरेको छ ।

प्रहरीले आइतबार बिहानदेखि सोमबार बिहान ११ बजेसम्म काठमाडौं उपत्यकाका विभिन्न ठाँउबाट ५ सय ४९ गाडी नियन्त्रणमा लिएको हो। लकडाउन अवज्ञा गर्नेमा ५ सय ३ ओटा २ पाङ्ग्रे र ४६ ओटा चार पाङ्ग्रे गाडी रहेका छन् । अनुमति नलिइ आफूखुशी चलाएका गाडीलाई ट्राफिक प्रहरीले नियन्त्रणमा लिएको महानगरीय ट्राफिक प्रहरी महाशाखाले जनाएको छ ।

नियन्त्रणमा लिएका गाडीलाई राति समय मिलाएर ट्राफिक प्रहरीले छोड्ने गरेको छ । गाडी नियन्त्रणमा लिएपछि त्यसमा रहेका व्यक्तिलाई भने ट्राफिक प्रहरीले जनपद प्रहरीको जिम्मा लगाउँदै आएको छ ।

लकडाउनको अवधिमा सुरक्षाकर्मी, स्वास्थ्यकर्मी, कूटनैतिक नियोग, एम्बुलेन्स, अत्यावश्यक र जिल्ला प्रशासन कार्यालयबाट अनुमति लिएका गाडीमात्र चलिरहेका छन् । अन्य गाडीचलाउन भने निषेध गरिएको छ ।

अत्यावश्यक काम परेर घर बाहिर निस्किनु परेमा प्रहरीको हटलाइन नम्बर १०० र ट्राफिक कन्ट्रोल रुमको १०३ मा फोन गरेर जानकारी गराउन ट्राफिक प्रहरीले अनुरोध गरेको छ ।