गल्याङमा तीन जना मात्रै होम क्वारेन्टाइनमा, ११ जनाको स्वाब परिक्षणका लागि पोखरा पठाइयो

२४ चैत्र, स्याङ्जा । स्याङ्जाको गल्याङ नगरपालिकामा होम क्वारेन्टाइनमा बस्नेको संख्या तिनमा झरेको छ । १५ दिन भन्दा बढि क्वारेन्टाइनमा बस्नेहरुलाई परिवारसँगै बस्ने अनुमति दिइएसँगै होम क्वारेन्टाइनमा बस्नेको संख्या तिनमा झरेको हो ।

गल्याङ नगरपालिकाको वडा नम्बर चारमा एक जना र छ मा दुई जना मात्रै होम क्वारेन्टाइनमा रहेको प्रमुख प्रशासकीय अधिकृत इश्वरीप्रसाद पाण्डेले जानकारी दिए । उनले १५ दिन भन्दा बढि होम क्वारेन्टाइनमा बसेकाहरुलाई साबधानीपूर्वक रहन आग्रह गर्दै स्वास्थ्य परिक्षण पछि परिवारसँगै बस्न अनुमति दिइएको बताए ।

पाण्डेले सम्बन्धित वडाका अध्यक्ष सहित स्वास्थ्यकर्मीले उनीहरुको नियमित निगरानी गर्ने पनि बताए । गल्याङमा चैत्र दुई गते यता विदेशबाट आएका एक सय १० जना मध्ये एक सय सात जना अब परिवारसँगै बस्न पाएका हुन् । अब विदेशबाट आएका मध्ये एक जना १० गते र दुई जना ११ गते आएका मात्रै होम क्वारेन्टाइनमा बसेका छन् ।

त्यस्तै नगरपालिकामा विदेशबाट आएका ११ जनाको स्वाब परिक्षणका लागि नमूना संकलन गरिएको छ । संकलन गरिएको स्वाव परिक्षणका लागि पोखरा पठाइएको छ । गल्याङ नगरपालिका स्वास्थ्य शाखा प्रमुख लिला भण्डारीले विदेशबाट आएकाहरुको स्वास्थ्य परिक्षण सँगै स्वाब संकलन गरिएको जानकारी दिए ।