गभर्नर अधिकारीद्वारा पदभार ग्रहण

२५ चैत्र, काठमाडौं । नेपाल राष्ट्र बैंकका नवनियुक्त गभर्नर महाप्रसाद अधिकारीले देशमा गम्भिर आर्थिक संकट आउने गरी कोरोना भाइरसको संक्रमण फैलिएपनि सबैको साथ र सहयोग लिएर वित्तीय तथा आर्थिक क्षेत्रमा सुधार गर्ने बताएका छन् ।

नेपाल राष्ट्र बैंकको गभर्नरमा आज प्रधानन्यायधीश चोलेन्द्रशमशेर जवरा समक्ष पद तथा गोपनीयताको शपथ लिए लगत्तै कार्यभार संहाल्न पुगेका अधिकारीेले भने– लगभग पाँच वर्षपछि फेरि संगै बसेर वित्तीय तथा आर्थिक क्षेत्रको सुधार गर्ने अभियानको नेतृत्व गर्ने मौका पाएको छु, तपाईंहरुको साथ र सहयोगले अवश्य पनि सफलता प्राप्त हुने मेरो विश्वास छ ।

सो अवसरमा डेपुटी गभर्नरद्वय चिन्तामणि शिवाकोटी र शिवराज श्रेष्ठलगायत उच्च पदस्थ कर्मचारीको उपस्थिति थियो ।हिजो बसेको मन्त्रिपरिषद बैठकले अधिकारीलाई आगामी पाँच वर्षका लागि गभर्नर पदमा नियुक्त गरेको हो ।