भारतबाट अत्यावश्यक औषधि ल्याउन समस्या

२८ चैत्र, काठमाडौं । भारतले प्रतिबन्ध हटाएपछि औषधि नेपाल ल्याउन समस्या भएको छ । कोरोना भाइरसको प्रकोपका कारण औषधि उद्योगमा कामदार नभएपछि औषधि आयात गर्न समस्या भएको हो ।

नेपाल औषधी व्यवसायी संघका अध्यक्ष मृगेन्द्रमेहर श्रेष्ठले दुवै देशमा भाइरसका कारण लकडाउनको स्थितिमा सामान ल्याउन समस्या र समाधानका लागि सरकारलाई आग्रह गरिएको बताए । भारतले निर्यात प्रतिबन्ध हटाएका औषधिहरूमा नेपालमा उत्पादन नहुने जीवनरक्षाका लागि प्रयोग हुने र सीसीयू तथा आईसीयुमा प्रयोग हुने औषधी रहेको बताइएको छ ।

कोरोना भाइरसको सङ्क्रमण विश्वव्यापी रूपमा बढ्दै गएपछि भारतले आफ्नो देशमा उत्पादन हुने २६ प्रकारका औषधिको निर्यातमा प्रतिबन्ध लगाएको थियो । त्यसको प्रत्यक्ष प्रभाव नेपालमा पनि देखिएको हो । विभिन्न देशको आग्रहपछि हाल उसले प्यारासिटामोल बाहेकका सबै औषधीको निर्यात माथिको प्रतिबन्ध हटाएको छ ।

सिमानामा सामान ओसारपसारमा सामेल मजदुरलाई सहजीकरण गरिदिन व्यवसायीहरूले अनुरोध गरेका छन् । यसबाट उत्साहित नेपाली व्यवसायीहरूले त्यस्ता औषधी आयातको योजना बनाइसकेका छन् ।  एउटै प्रकारको औषधि र एउटै व्यवसायीको भएमा मात्रै ढुवानीकर्ताहरूले सहजै ल्याइदिने गरेको अनुभव व्यवसायीहरूको छ ।

यता औषधि उत्पादक सङ्घका अध्यक्ष नारायणबहादुर क्षेत्रीले भारतको औषधि निर्यात खुल्ला गर्ने निर्णयसँगै नेपालमा उत्पादन हुने औषधिका लागि भारतबाट आयात गर्नुपर्ने कच्चापदार्थ पनि सहज हुने अपेक्षा औषधि उत्पादकहरूले गरेको र त्यसका लागि पनि ढुवानी र मजदुर दुवैको व्यवस्थालाई सहज पारिनुपर्ने बताएका छन् । आफूहरूसँग हाल केही कच्चा पदार्थ भएपनि लकडाउन अझै लम्बिँदै गएमा त्यसको प्रभाव नेपालमा उत्पादन हुने औषधिमा समेत पर्न सक्ने उनको भनाइ छ ।