दश एसएसपी डीआईजीमा बढुवा सिफारिस, प्रहरीमा व्यापक असन्तुष्टि

२९ चैत्र, काठमाडौं । दुई तिहाईको कम्युनिष्ट सरकारले शुक्रबार मध्यरातमा दश डीआईजीको बढुवा गरेको छ । प्रहरी ऐन र नियावली विपरित जुनियरलाई सिनीयर र सिनीयरलाई जुनीयर बनाउँदै गरेको बढुवाप्रति प्रहरी संगठन भित्र व्यापक असन्तुष्टि देखा परेको छ ।

प्रधानमन्त्री केपी शर्मा ओलीले लहडका भरमा १२ जनाको पूर्व दरबन्दी कटौती गरेपछि प्रधानमन्त्री ओली र गृहमन्त्री रामबहादुर थापा बादलबीच पनि चिसोपन शुरु भएको स्रोतले बताएको छ । गृहमन्त्री थापाले १९ जना डीआईजीको दरबन्दी बनाउने प्रस्वात राखेका थिए तर प्रधानमन्त्रीले ठाडो हस्तक्षेप गर्दै १४ जनाको मात्र दरबन्दी कायम गराएका छन् ।

यसअघि प्रहरीमा साधारणतर्फ २६ डीआईजी दरबन्दी कायम थियो र प्रहरी नियमावलीले ओएनएमको सर्वेक्षण प्रतिवेदनपछि मात्रै प्रहरीको दरबन्दी कायम गर्नुपर्ने व्यवस्था गरेको छ । यसअघि पनि गृहसचिव महेश्वर न्यौपाने र आईजीपीबीच प्रहरीको दरबन्दी कटौटीका विषयमा चर्का चर्की परेको सार्वजनिक भएको थियो ।

हिजो कांग्रेस सभापति शेरबहादुर देउवाका पालामा जेष्ठता मिचियो भन्दै कुर्लने केपी ओली नै यतिबेला जेष्ठता र कार्यक्षमताको अबमुल्यन गर्दै राम्रा होइन हाम्रालाई बनाउने धुनमा लागेको यसैबाट प्रस्ट हुन्छ ।

गृहसचिव न्यौपानेको अध्यक्षतामा बसेको बढुवा समितिको बैठकले एसएसपीबाट डीआईजी बढुवामा वरियता मात्र नभई कार्यक्षमता मूल्यांकनलाई प्रमुख आधार बनाएर बढुवा सिफारिस गरेको बताएका छन् । गृहसचिव न्यौपानेको अध्यक्षतामा बसेको बढुवा समितिमा आईजीपी ठाकुरप्रसाद ज्ञवाली सदस्य र एआईजी शैलेश थापा क्षेत्री सदस्यसचिव थिए ।

डीआईजीको लागि ३४ एसएसपी प्रतिस्पर्धामा थिए । सुची अनुसार एसएसपीहरु घनश्याम अर्याल, प्रकाशजंग कार्की, ईश्वरबाबु कार्की, बसन्त पन्त, सहकुल थापा, धिरज प्रताप सिंह, बसन्त लामा, उत्तम सुवेदी, रविन्द्र धानुक र अरुण विसी डीआईजीमा बढुवा सिफारिस भएका छन्।

अब सातवटा प्रदेश प्रहरी कार्यालय, महानगरीय प्रहरी कार्यालय रानीपोखरी, केन्द्रिय अनुसन्धान ब्यूरो ‘सीआईबी’ , विशेष ब्यूरो, राष्ट्रिय सुरक्षा परिषदको सचिवालय सिंहदरबार, अख्तियार दुरुपयोग अनुसन्धान आयोग प्रहरी महाशाखा, प्रहरी प्रधान कार्यालय नक्साल र राष्ट्रिय प्रहरी प्रशिक्षण प्रतिष्ठान महाराजगन्जमा एक र एक गरि जम्मा १४ डीआईजी दरबन्दी रहनेछन्।

हाल प्रहरीमा कार्यरत चार डीआईजीमध्ये निरजबहादुर शाही सीआईबी, प्रध्युम्न कार्की दुई नम्बर प्रदेश प्रहरी कार्यालय जनकपुर, सुर्यप्रसाद उपाध्याय प्रहरी प्रधान कार्यालय नक्साल र बिश्वराज पोखरेल महानगरीय प्रहरी कार्यालय रानीपोखरीमा कार्यरत छन् ।

विना योजना दरबन्दी कटौती गरिएपछि प्रहरीको तल्लो तहसम्म नै यसको असर देखा पर्ने सुरक्षाविद्ले बताएका छन् । सिनियर र कार्यक्षमतामा उष्कुट हुदाहुँदै पनि बढुवामा छुट्न हुन पुगेका एक दर्जन एसएसपीहरुले सामुहिक राजीनामा दिने तयारी थालेको एक एसएसपीले नेपालबहस डटकमलाई बताए ।