कोरोनाविरुद्ध लड्ने स्वास्थ्यकर्मी र पत्रकारको सम्मानमा १ मिनेट ताली बजाऔ

३० चैत्र, काठमाडौं । नेपाल पत्रकार महासंघ लगायतका संघ संस्थाले नयाँ बर्षको पहिलो दिन कोरोनाविरुद्ध लड्ने स्वास्थ्यकर्मी, सुरक्षाकर्मी, पत्रकार लगायतको सम्मानमा १ मिनेट ताली बजाएर मनाउन आह्वान गरेका छन ।

नेपाल पत्रकार महासंघ, गैरसरकारी संस्था महासंघ नेपाल लगायत विभिन्न महासंघ संजाल, नागरिक समाज लगायतका संघ संस्थाले नयाँ वर्षको शुभारम्भसँगै २०७७ बैशाख १ गते बिहान ६ बजे कोरोना संक्रमण विरुद्ध अग्रमोर्चामा लडिरहेका स्वास्थ्यकर्मीसहितका योद्धाहरु, सुरक्षाकर्मीहरु, जनप्रतिनिधिहरु, कर्मचारीहरु, पत्रकारहरु, समुदाय स्तरमा खटिएका स्वयंसेवकहरु र लकडाउनको पालना गरिरहेका आम जनसमुदायप्रति उच्च सम्मान व्यक्त गर्न आ -आफ्नो स्थानबाट १ मिनेट ताली बजाएर मनाउन आह्वान गरेका हुन ।

साथै त्यसबेला विभिन्न महासंघ संजाल र नागरिक संस्थाका प्रतिनिधिहरु बिच ५ मिनेटसम्म नेटवर्क बैठक मार्फत् त्यसलाई आदान प्रदान गर्न पनि सामुहिक आह्वान गरिएको छ । नेपालमा नयाँ बर्ष मनाउँदै गर्दा युरोप अमेरिका लगायतका विकसित देशहरु शोक मनाइरहेका छन ।

कोरोनाले विश्वमै ठूलो संकट ल्याउँदा पनि यसबाट बच्न सबै नेपालीले आफ्नो क्षेत्रबाट ठूलो योगदान गरेको र अझै गर्न बाँकी रहेकाले आज सबै नेपाली एक आपसमा नयाँ बर्ष मनाउन पाएको सम्मानमा १ मिनेट ताली बजाउन आ्हवान गरिएको हो ।