नयाँ वर्षको शुभकामना

१ वैशाख, काठमाडौं । आज नेपाली संवत् २०७७ को पहिलो दिन । अर्थात नयाँ वर्षको थालनी भएको दिन । नेपालीहरुको मौलिक तिथिमिति बमोजिम आज हर्षाेल्लासका साथ मनाइने दिन हो । तर यो वर्ष कोरोनाको सन्त्रासले देश बन्दाबन्दीको अवस्थामा छ । मानिस घर बाहिर निस्कने अवस्थामा छैनन् । देशका मठमन्दिर बन्द छन् । सर्वसाधारणको घुइँचो लाग्ने आरध्यदेव श्री पशुपतिनाथदेखि सम्पूर्ण देवस्थल बन्द छन् । दर्शनार्थी आज घरबाटै देवदेवीलाई स्मरण गर्न बाध्य छन् ।

अर्काे महत्वपूर्ण पक्षका रुपमा रहेको यो दिन विशेष जमघटको पनि दिन हो । तर कोरोनाको त्रासले मानिसले सामाजिक दूरी कायम राख्न बाध्य भएका छन् । अर्थात कसैलाई बोलाउने वा कसैकहाँ जाने भन्ने कुरा आजलाई सहज छैन । त्यसैले घर आँगनमै वर्षको पहिलो दिन सीमित गनुपर्ने बाध्यता आइलागेको छ ।

यसै उपलक्ष्यमा देशका महत्वपूर्ण ओहदामा बसेका व्यक्तिले दिएका शुभकामना सन्देश पनि यही कोरोना युद्ध जित्नेमै केन्द्रित भएको पाइन्छ । राष्ट्रपति विद्यादेवी भण्डारीले दिएको सन्देशमा कोरोना विरुद्ध सबै एकजुट भइ सामना गर्नुको विकल्प नरहेको उल्लेख छ । उपराष्ट्रपति नन्दबहादुर पुनले पनि नयाँ वर्षको प्रारम्भमै कोरोना भाइरस नियन्त्रण हुने विश्वासका साथ नेपाली जनतामा नयाँ वर्षको शुभकामना बाँडेका छन् ।

प्रधानमन्त्री केपी ओलीले कोरोना भाइरससँग संघर्ष गर्न राष्ट्रिय अन्तर्राष्ट्रिय जगतसँग हातेमालो गर्ने भन्दै त्यसका लागि नेपाली जनताले साथ दिने विश्वासका साथ नयाँ बर्षको शुभकामना दिएका छन् । यस्तै प्रमुख प्रतिपक्षी दल नेपाली कांग्रेसका सभापति शेरबहादुर देउवाले पनि नयाँ वर्षको शुभकामना सन्देशमा नेपाली जनतालाई कोरोनाविरुद्ध एकभएर सामना गर्न सबैलाई आह्वान गरेका छन् ।

उता, नेकपाका अध्यक्षसमेत रहेका पूर्व प्रधानमन्त्री पुष्पकमल दाहाल प्रचण्डले नयाँ वर्षले कोरोनाविरुद्धको संघर्षमा सफलता मिलोस् भनी शुभकामना दिएका छन् । पुर्वराजा शाहले नेपाली जनता सधै खुशी सुखी रहेको आफुले देख्न चाहेको भन्दै सबै नेपालीको सामुहिक एकताबाट सगरमाथा जस्तैगरी देशको शीर उच्च पारेको हेर्ने इच्छा प्रकट गरेका छ्न । शाहले कसैले कसैलाई निषेध गरेर जाने सोचको आयु समाप्त भएको बताए ।

आजको यो विशेष दिनमा नेपालबहस डटकम पनि हाम्रा पाठक, विज्ञापनदाता, शुभेच्छुक तथा समस्त नेपालीको उन्नति प्रगति, सुख, शान्ति,समृद्धिको कामना गर्दै हरेक नेपालीको सुस्वास्थ, दीर्घायु, भातृत्व र एकता होस् भन्ने कामना गर्दछ ।