कैलालीमा ६५ बर्षीया बृद्धामा कोरोना संक्रमणको पुष्टि !

१ वैशाख लम्की । कैलालीमा एक महिलामा कोरोना संक्रमणको पुष्टि भएको छ । लम्की चुहा नगरपालिका १ की ६५ बर्षीया बृद्धामा कोरोना संक्रमण पुष्टि भएको सेती प्रदेश अस्पतालले जनाएको छ । यससँगै नेपालमा कोरोना संक्रमितको संख्या १३ पुगेको छ । कैलालीमा मात्रै संक्रमितको संख्या ५ पुग्यो ।

यसअघि दुबईबाट आएका एक युवक, भारतबाट आएका दुई युवक र कैलालीकै दुई महिलालाई कोरोना संक्रमणको पुष्टि भइसकेको छ । विरगञ्जमा चुरापोते बेच्ने उनी लकडाउनपछि कैलाली फर्किएकी थिइन । वीरगञ्जबाट गएको चैत ९ गते घर आएकी उनी १२ देखि २९ गतेसम्म कैलालीको लम्की बहुमुखी क्याम्पसको क्वरेण्टीनमा बसेकी थिइन् । १७ दिन क्वरेण्टीनमा बस्दा पनि कुनै लक्षण नदेखिएपछि २९ गते उनलाई घर पठाइएको थियो ।

तर सोमबार गरिएको परीक्षणमा कोरोना पुष्टि भएपछि अहिले उनलाई सेती प्रादेशिक अस्पताल धनगढीमा राखिएको छ । नेपालमा अहिलेसम्म १३ जनामा देखिएको संक्रमण सामान्य छ । धेरैलाई सञ्चो हुने क्रम बढेको छ भने एक जना उपचारपछि घर फर्किसककेका छन । यसअघि काठमाडौंमा दुई, धादिङमा एक, बागलुंगमा दुई र पर्सामा तीन जनाामा कोरोना संक्रमण देखिएको छ ।

पर्सामा कोरोना संक्रमित भारतीय नागरिक हुन । उनीहरुको विरगञ्जमै उपचार भइरहेको छ । नेपालमा अहिलेसम्म कोरोनाबाट कसैको ज्यान गएको छैन । तर विश्वभर कोरोनाबाट संक्रमित हुनेको संख्या १ लाख १५ हजार नाघिसकेको छ ।