पशुपति क्षेत्रका बाँदरका लागि पर्याप्त खाना, मन्दिरमा नित्य पुजा

३ वैशाख, काठमाडौं । देश लकडाउनमा गएको तीनसाता उकालो लागिसक्यो । यसबीच देशका सबै मठमन्दिर बन्द छन् । राजधानीको मुटुमा रहेको हिन्दूहरुका आराध्यदेव श्री पशुपतिनाथको मन्दिर पनि बन्द गरिएको छ । सर्वसाधारणमा कोरोना भाइरसको संक्रमण नफैलियोस् भनेर यस्तो निर्णय कडाइका साथ लागू गरिएको हो ।

भक्तजनको चहलपहल घटेपछि पशुपति– गुहेश्वरी क्षेत्रको मन्दिर परिसर तथा स्लेष्मान्तक वनमा विचरण गर्ने बाँदरहरुको हाल के होला ? धेरैलाई जिज्ञासा लाग्न सक्छ । अझ दैनिक यस क्षेत्रको भ्रमण गरी बाँदरलाई भोजन गराउनेहरुको मनमा यस्तो जिज्ञासा धेरै हुनुपर्छ । तर यसको चिन्ता गर्नुपर्ने अवस्था छैन यतिबेला ।

पशुपति क्षेत्र विकास कोषले यसको राम्रो प्रबन्ध गरेको छ । यस क्षेत्रमा विचरण गर्ने झण्डै तीन हजार बाँदरका लागि कोषले दैनिक चारसय केजीको पकवानको व्यवस्था गरेको छ । कोषका कार्यकारी निर्देशक डा. घनश्याम खतिवडा भन्छन्– बाँदर लगायत चराचुरुङ्गीका लागिसमेत कोषले खानेकुराको बन्दोवस्त गरेको छ । बाँदरहरुलाई पर्याप्त खाद्य सामग्री दिइने गरेको छ भने बाँदर भनेको यो क्षेत्रको सौन्दर्य र गहना हो, हामी यसका लागि आवश्यक खाद्य व्यवस्था गर्न चुक्ने कुरै भएन ।

हुनपनि नेपालबहस डटकमका प्रतिनिधि स्वयं यस क्षेत्रको अवलोकन गर्न मंगलबार पुग्दा त्यस्तै परिवेश फेला पा¥यो । भक्तजनले दिने विस्कुटलगायत खाद्य पदार्थ बाँदरले रुचाएको पाइएन । यस भेगमा झण्डै तीनहजार हाराहारीमा बाँदर रहेका छन् । यस्तै परेवा लगायतका चराचुरङ्गीका लागि दैनिक एक सय पचास केजी मकैको दाना वितरण गरिने जानकारी पनि कार्यकारी निर्देशक डा. खतिवडाले दिए ।

गएको चैत ११ गतेदेखि लकडाउन सुरुभए लगत्तै पशुपति गुहेश्वरी लगायतका मन्दिर सर्वसाधारणका लागि बन्द गरिएको छ । तर पशुपतिनाथको नित्य पूजा भने पूर्ववत रुपमै हुने गरेको पनि डा. खतिवडाले बताए ।