रिपोर्ट नेगेटिभ आएपछि जिल्लाबासीमा त्रास कम, दुई टोलमा शिलबन्दी जारी

 ♦ धीरुभाई

४ बैशाख, सप्तरी । आरडीटी रिपोर्ट पोजेटिभ आएपछि दुई टोललाई गरिएको शिलबन्दी बिहीबार पनि जारी रहेको छ । तर, गजेन्द्रनारायण सिंह अस्पताल राजविराजको आइसोलेशनमा उपचाररत उनीसहित सातजना जमातीको थ्रोट स्वाब परीक्षण रिपोर्ट नेगेभिट आएको छ । यसले जिल्लाबासीमा त्रास कम भएको छ ।

गत मंगलबार उनीहरुको ¥यापिड डाइग्नोस्टिक टेस्ट गर्दा दुई जनाको रिपोर्टमा कोरोना पोजेटिभ पाइएपछि जिल्लाबासी त्रसित भएका थिए । दुई दिनदेखि त्रसित जिल्लाबासीसहित स्थानीय प्रशासन पनि हाईअर्लट (उच्च सर्तकता) अपनाउन थालेका छन । पोजेटिभ पाइएका व्यक्तिको टोल तुरुन्त शिलबन्दी गरी घरबाट कसैलाई निस्किन नदिनुको साथै आवतजावत पूर्ण बन्द ग¥यो । शिलबन्दी बिहीबार पनि जारी रहेको जिल्ला प्रशासन कार्यालय सप्तरीका सूचना अधिकारी आनन्द ठाकुरले जानकारी दिए ।

दुई जनामा पोजेटिभ पाइएपछि उनीसहित सातै जनाको थ्रोट स्वाब परीक्षणको (पीसीआर) लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको थियो । बुधबार साँझ उनीहरुको नेगेटिभ रिपोर्ट आएको गजेन्द्रनारायण सिंह अस्पतालका मेडिकल सुपरिटेन्डेन्ड डा. चुमनलाल दासले जानकारी दिएका छन् ।

¥यापिड डाइग्नोस्टिक टेस्ट (आरडीटी) को रिपोर्टमा तिलाठी कोइलाडी गाउँपालिका १ का ५८ वर्षीय र खडक नगरपालिका ११ का ५१ वर्षीय गरी दुई जनामा कोरोनाको पोजेटिभ पाइएको थियो । पछि यी दुई जनाको रिपोर्ट नेगेटिभ आएपनि गजेन्द्रनारायण सिंह अस्पतालको आइसोलेशनमा नै राखेर उपचार गरिरहेको र उनीहरुको अवस्था सामान्य रहेको बताइएको छ । उनीहरुको गृह टोल बेलही र जाँजरमा शिलबन्दी जारी छ ।

गत मार्च ८ र ९ मा नयाँदिल्लीको निजामुद्दिन मस्जिदमा आयोजित मरकज (धार्मिक भेला) मा सहभागी भएर जमाती (धर्म प्रचारक)का रुपमा आठ जना जिल्ला फर्किएको बताइएको छ । आठ जना जमातीमध्ये सात जनाको रिपोर्ट आएको छ भने एकजनाको स्वाब परीक्षणको रिपोर्ट आउन बाँकी रहेको बताइएको छ ।

आठजना जमातीमध्ये खड्ग नगरपालिकाका तीनजना, राजविराज नगरपालिका, सुरुंगा नगरपालिका, तिलाठी कोइलाडी गाउँपालिका, विष्णुपुर गाउँपालिका र अग्नीसाइर कृष्णासवरण गाउँपालिकाका एकएकजना रहेका छन ।