गाउँपालिकाको राहतले छुन सकेन जङ्गल छेउको मुक्तहलिया बस्ती

५ वैशाख,डडेल्धुरा । गन्यापधुरा गाउँपालिका वडा नं १ भेटास्थित मुक्तहलिया बस्तीमा सरकारको राहत पुग्न सकेको छ्रैन । बन्दाबन्दी समयमा दैनिक ज्यालामजदूरी गर्ने वर्गका लागि स्थानीय तहमार्फत राहत वितरण भइरहे पनि मुक्तहलिया बस्तीमा नपुगेको स्थानीयवासीले गुनासो गरेका छन् । बाह्र वर्षदेखि जङ्गल छेउ बस्दै आएका मुक्तहलियाले वडा कार्यालयबाट आफूहरुले अहिलेसम्म प्रतिपरिवार एकएक मास्क र दुई साबुन मात्रै पाएको बताएका छन् ।

दैनिक ज्यालादारी गरेर गुजारा गर्ने यहाँका मुक्तहलिया लकडाउनपछि आफूहरु घरमै बस्न बाध्य भएको र साँझबिहान खानका लागि समस्या भएको बताउँछन् । भारतको दिल्लीबाट फर्किएको एक परिवारले भने १४ दिन क्वारेन्टाइनमा बसेपछि स्वास्थ्य परीक्षण गरी ३० केजी चामल पाएको जानकारी दिएको छ । ठूलो परिवार रहेकाले पाइएको चामलसमेत सकिन लागेको सो परिवारको गुनासो छ ।

मुक्तहलिया अगुवा भरत सार्कीले दैनिक ज्यालामजदूरी गरी खाने वर्ग मुक्तहलियालाई अहिले खाद्यान्न समस्या भएको बताएका छन् । उनले वडा कार्यालय र पालिकालाई राहतका लागि अनुरोध गरिए पनि अहिलेसम्म उपलब्ध हुन नसकेको गुनासो गरेका छन् । गन्यापधुरा– १ का वडाध्यक्ष चेतराम भट्टले वडाभित्र रहेका मुक्तहलिया परिवारका लागि गाउँपालिकासँग समन्वय गरी राहत वितरण गरिने आश्वासन दिएका छन् ।