कोरोना संभावित १८८ को आरडीटीमा सबैको नेगेटिभ

५ बैशाख, सप्तरी । सप्तरीको विभिन्न स्थानमा कारोना संक्रमित आशंकामा १८८ जनाको ¥यापिड डाइग्नोस्टिक टेष्ट (आरडीटी) गरिएकोे छ ।

राजविराजस्थित गजेन्द्रनारायण सिंह अस्पताल र स्वास्थ्य कार्यालयमार्फत जाँच गरिएकाहरुमध्ये दुई जनामा कोरोना पोजेटिभ पाइएको स्वास्थ्य कार्यालय सप्तरीले जनाएको छ । ती दुबै जनाको राजविराजस्थित गजेन्द्रनारायण सिंह अस्पतालमा स्वाब सकंलन गरी बीपी कोइराला स्वास्थ्य विज्ञान प्रतिष्ठान धरान पठाइएकोमा पीसीआर रिपोर्ट भने नेगेटिभ आएको छ ।

आरडीटीसँगै १८८ जनाको मलेरिया जाँच समेत गर्दा सबैको रिपोर्ट नेगेटिभ आएको स्वास्थ्य कार्यालय सप्तरीका प्रमुख दुनियालाल यादवले जानकारी दिएका छन् ।

जिल्लाको राजविराज नगरपालिकाको मलेठमा २३, कञ्चनरुप नगरपालिकामा ३२ जना, अग्नीसाइर कृष्णासवरण गाउँपालिकामा १८, महदेवा गाउँपालिकामा छ, हनुमाननगर कंकालिनी नगरपालिकामा २१, तिलाठी कोइलाडी गाउँपालिकामा पाँच, बोदेवर्साइन नगरपालिकामा १०, बलान बिहुल गाउँपालिकामा १३, खडग नगरपालिकामा १८ जनाको ¥यापिड डाइग्नोस्टिक टेष्ट गरिएको थियो । यसैगरी डाक्नेश्वरी नगरपालिकामा दुई, राजगढ गाउँपालिकामा दुई, छिन्नमस्ता गाउँपालिकामा चार जनाको आरडीटी गरिएको बताइएको छ ।

यसैगरी राजविराजस्थित गजेन्द्रनारायण सिंह अस्पतालमार्फत १८ जनाको स्वाब परीक्षण गरिएको छ । ती सबैको स्वाब परीक्षण रिपोर्ट नेगेटिभ आएकोे छ । यस अस्पतालको आइसोलेशनमा शंकास्पद चार जनाको उपचार भइरहेको छ ।