डलरको भाउ फेरि सर्वाधिक उचाईमा

विश्वका प्रमुख सेयर बजारहरुमा गिरावट

५ वैशाख काठमाडौं । अमेरिकी डलरको भाउ फेरि सर्वाधिक उचाईमा पुगेको छ । केन्द्रीय बैंकका अनुसार शुक्रबार एक अमेरिकी डलरको खरिददर १२२ रुपैयाँ ६८ पैसा र बिक्रीदर १२३ रुपैयाँ २८ पैसा कायम भएको छ ।

यो हालसम्मकै उच्च मूल्य हो । बिहीबार एक अमेरिकी डलरको खरिददर १२२ रुपैयाँ ०१ पैसा र बिक्रीदर १२२ रुपैयाँ ६१ पैसा थियो । विश्वको अर्थतन्त्र नै संकुचन हुँदैछ । लगानीका अन्य क्षेत्र साँघुरिएका छन् । विश्वका प्रमुख सेयर बजारहरुमा गिरावट आएको छ । अन्तराष्ट्रिय बजारमा तेलको माग ह्वात्तै घटेको छ ।

जसकाकारण उत्पादन कटौतीका निर्णय भएका छन् । यसर्थ, तेलमा पनि लगानीकर्ताको आकर्षण कम छ । यस्तो बेला लगानीकर्ता डलरतर्फ आकर्षित भएका हुन् ।

डलर चुलिंदा नेपाललाई फाइदा र बेफाइदा दुवै हुन्छ । तर अहिले पर्यटन र विप्रेषण दुवै प्रभावित भएकाले लाभ लिन सक्ने अवस्था कम छ । स्थिर विनिमय दरका कारण भारु कमजोर हुँदा नेपाली रुपैयाँ पनि प्रत्यक्ष प्रभावित भएको हो ।