चौतर्फी दवाव परेपछि मन्त्री ढकालले लिए यु टर्न

७ बैशाख, काठमाडौं । स्पष्टीकरण दिन बोलाइएका डा. शेरबहादुर पुनसँग स्वास्थ्यमन्त्री भानुभक्त ढकालले आज सुलह गरेका छन् ।

शुक्रराज ट्रपिकल तथा सरुवा रोग अस्पताल, टेकुमा कार्यरत डा. पुनसँग चिढिएका मन्त्री ढकालले मन्त्रायल तान्ने आशयका साथ गत बिहीबार नै स्पष्टीकरण सोधेका थिए । तर डा. पुन आज मात्र स्पष्टीकरणसहित मन्त्रालय गएका थिए ।

यसबीच मन्त्री ढकालको कार्यशैलीको विभिन्न सञ्चारमाध्यम र सामाजिक सञ्जालमा चर्काे विरोध भएपछि अन्ततः ब्याक गियर लगाउन बाध्य भएका हुन् । मन्त्रालय स्रोतका अनुसार, डा. पुनले ओम्नी समूहले चीनबाट आयात गरी ल्याएको आरडीटी गुणस्तरहिन र बजार मूल्यभन्दा चर्काे भएको भन्दै अस्पतालमा विरोध गरेका थिए ।

यसबाट आक्रोशित भएका मन्त्री ढकाल जसरी भएपनि उनलाई हटाउन चाहन्थे । तर सबैतिरबाट विरोध भएपछि आज साँझ मन्त्रालय पुगेका डा. पुनलाई आईन्दा सार्वजनिक सञ्चारमाध्यममा बोल्नुअघि मन्त्रालयको प्रवक्तासँग अनुमति लिएर मात्र दिन मौखिक आदेश भएको बुझिएको छ ।

तर उपयुक्त समयमा डा. पुनलाई कारवाही गरी छाड्ने मन्त्री ढकाल चाहन्छन् । मन्त्रालयका पदाधिकारी तथा शुभचिन्तकले हाललाई सुलह गर्न सल्लाह दिएकाले उनी पछाडि हटेको बताईएको छ ।