लकडाउनका कारण प्रभावितहरुलाई मालिकामा खाद्य बैंक स्थापना

१२ वैशाख, म्याग्दी । मालिका गाउँपालिकाले दरवाङमा खाद्य बैंक स्थापना गरेको छ । कोरोना भाइरस रोकथामका लागि गरिएको लकडाउनका कारण प्रभावित भएका विपन्न र श्रमिकलाई वितरण गरिने राहत खाद्यान्न सङ्कलन गर्न खाद्य बैंक स्थापना गरेको हो । बैंकमा बिहीबार विभिन्न क्षेत्रबाट खाद्यान्न र स्वास्थ्य सामग्री सहयोग प्राप्त भएको छ । प्रभु बैंकको दरवाङ शाखाले सामाजिक उत्तरदायित्वअन्तर्गत १२ बोरा चामल र दुई प्याकेट खानेतेल उपलब्ध गराएको छ ।

शाखाका प्रबन्धक बिपीन चोखालले गाउँपालिकाका अध्यक्ष श्रीप्रसाद रोकालगायतलाई खाद्यान्न हस्तान्तरण गरेका थिए । सङ्कलित खाद्यान्न पालिकाका वडा कार्यालयमार्फत लकडाउनका कारण रोजीरोटी गुमेर बिहान–बेलुका खानका लागि समस्यामा परेका विपन्न तथा श्रमिकका परिवारलाई वितरण गरिने गाउँपालिकाले जनाएको छ । पहिलो चरणमा ८८८ परिवारलाई चामल, दाल, नुन र तेल उपलब्ध गराइएको छ ।

यसैगरी नेपाली काँग्रेस प्रदेश निर्वाचन क्षेत्र (ख), म्याग्दीले १५ बोरा चामल र दुई प्याकेट तेलका साथै मास्क र स्यानिटाइजर सहयोग गरेको छ । काँग्रेसका नेता हीरा पुन, खिम पुनलगायतले सामग्री हस्तान्तरण गरेको थियो ।