रुकुमका अवरुद्ध सडक सञ्चालनः खाद्यान्न ढुवानीमा सहज

१२ वैशाख, रुकुम । पहिरो हटाएर सडक सफा गरिएपछि रुकुममा खाद्यान्न ढुवानीमा सहज भएको छ । गत वर्ष चैत पहिलो हप्ता परेको वर्षाका कारण खसेको पहिरो हटाइएपछि देउखोला खण्डको बाटो पुनःसञ्चालन भएपछि सर्वसाधारणलाई आवागमन र खाद्यान्न ढुवानीमा सहजता आएको हो । बालुवा–देउखोला सडकखण्डअन्तर्गत पर्ने भूमे गाउँपालिका वडा नम्बर ५ को उवाबाङमा गत वर्ष चैतमा पहिरो झरेको थियो । त्यसबाट सडक अवरुद्ध भएपछि नागरिकलाई आवतजावत र सामान ढुवानी गर्न समस्या भएको थियो ।

लकडाउनका बेला अहिले गाउँतिर खाद्यान्न अभाव हुन थालेपछि स्थानीय तह र जिल्ला प्रशासन कार्यालयको पहलमा बाटो खुलाइएको हो । तीन दिनसम्म लगातार डोजर लगाएर माथिबाट झरेको पहिरो हटाइएपछि सडक चलेको सिस्ने गाउँपालिका वडा नम्बर २ का वडाध्यक्ष जीवन केसीले जानकारी दिए । यसपटक स्थानीय युवाले भीरमा झुण्डिएका ढुङ्गा हटाएर एमबी ग्रुपको डोजरमार्फत बाटो खुलाएको गाउँपालिकाका प्रवक्ता केसीको भनाइ छ ।

बाटो पुनः सञ्चालन भएपछि सिस्ने १ र २ तथा पुथाउत्तरगंगा गाउँपालिका ७, ८, ९ र १४ का नागरिकलाई सहज भएको छ । बाटो खुलेसँगै कोरोनाको कारण भएको लकडाउनमा अत्यावश्यक सामग्री ढुवानी तथा एम्बुलेन्समार्फत बिरामीलाई ओसारपसार गर्न सहज हुने केसीले बताए । लकडाउन अवधिभर सोही बाटो भएर गाडी पुग्ने ठाउँसम्म र सडक नपुगेका गाउँमा खच्चरमार्फत खाद्यान्नलगायत अन्य सामान ढुवानी गरिने छ ।