दिनदुखीको घाउमा मलमपट्टी लगाउँदै एक्लो यूवानेता भूपेन्द्रजंग शाही

कांग्रेस युवा नेता शाहीको दैनिकी:- बिहानदेखि रातिसम्म राहत बाँड्दै

♦ कुसुम विश्वकर्मा

१३ बैशाख, काठमाडौं । विगत एक महिनादेखि देश लकडाउनमा छ । कोरोना भाइरसको संक्रमणबाट जोगिने भरपर्दाे उपायका रुपमा यो विधि सर्वत्र अपनाइएको छ । केपी ओली नेतृत्वको सरकार लकडाउन गर्दा पुग्ने मनस्थितिमा छ । लकडाउन गरेपछि सर्वसाधारणले कस्तो अवस्था भोगेका छन् भन्नेतिर कसैको ध्यान पुगेको छैन । मानिस खान नपाएर भोकभोकै सयौं किलोमिटर पैदल यात्रामा निस्किए । तिनै निम्न वर्गको मत लिएर सत्तामा पुगेका कम्युनिष्ट नेता भने घरघरमा लुकेर बसेका छन् ।

कोरोनाको त्रासले नेताहरु घरमा लुकिरहँदा नेपाली कांग्रेसका एक युवानेता भने कालीकोटदेखि राजधानीका टोलटोलमा पुगेर राहत बाड्दै छन् । कोरोना भाइरसको बढ्दो संक्रमणका बीच ज्यान जोखिममा राखेर दिनदुखीहरुको घाउमा मलम लगाउँदै निरन्तर हिडिरहेका छन्, एक्लो भूपेन्द्रजंग शाही । कांग्रेसका तर्फबाट कालिकोट जस्तो अति दुर्गम जिल्लामा दुई दुईपटक सांसदको निर्वाचन लडिसकेका तथा नेपाल तरुण दलका महासचिव भैसकेका युवा नेता भूपेन्द्रजंग शाहीलाई अहिले राहत बाँड्न भ्याइनभ्याई छ । बिहानैदेखि उनी सम्पर्कमा आएका दिनदुखीलाई राहत बाड्न सक्रिय हुने गरेका छन् ।

निजी खर्चमा उनी खान नपाएर भोकभोकै परेका सर्वसाधारण जनताको न्यूनतम आवश्यकता पूरा गर्ने खालको खाद्यान्न सामाग्री लिएर कहिले भक्तपुर हानिन्छन् त कहिले थानकोट पुग्ने गरेका छन् । आफ्नो गृह जिल्ला कालीकोट मात्र होइन कर्णाली प्रदेशबाट काठमाडौं आएर विभिन्न पेशा व्यवसाय गर्ने समग्र जनताको सम्पर्कमा पुगेर यूवानेता शाहीले राहत र उद्धारको काम जारी राखेका छन् । साथै अन्य क्षेत्रका दिनदुखीहरु प्रति पनि उनी उत्तिकै संवेदनशील भएर राहत वितरण गरिरहेका छन् ।

ओली सरकारले दायित्व पूरा गरेन भन्दैमा नेपाली कांग्रेस पनि गैर जिम्मेवार बन्न मिल्दैन भन्दै उनले जनतालाई समस्या पर्दा कांग्रेसका नेता सडकमा आउनुपर्ने उनको धारणा छ । नेपाली कांग्रेस भनेको बैकल्पिक सरकार हो भन्दै उनले नेताहरु मिडियामा देखिने तर फिल्डमा नआउने प्रवृत्ति बिल्कुलै गलत भएको बताए । लकडाउन गर्ने अनि सुतेर बस्ने सरकारको रबैयाको चर्काे आलोचना गर्दै युवा नेता शाहीले नेपाली कांग्रेसका तर्फबाट संसदमा पुगेका युवा नेताहरुसमेत घरबाट बाहिर ननिस्कनु गलत भएको प्रतिक्रिया दिए ।

टेलिभिजनमा सधैं देखिने काठमाडौंकै कतिपय नेताहरु कहिल्यै जनताको घाउमा मल्हम पट्टी लगाउनतिर अग्रसर भएनन् – उनले भने, यस्ता नेताबाट देश र जनताले के अपेक्षा गर्ने ? जनता दुख र संकटमा पर्दा कता हराए अरु नेता ? जनता संकटमा पर्दा घरभित्रै ग्प्तबास बस्ने कि चह¥याईरहेको जनताको घाउमा मलमपट्टी लगाउने ? उनको प्रश्न छ ।यतिबेलै हो नेपाली कांग्रेसले आफ्नो उपस्थिति देखाउने बेला भन्दै उनले दुख र संकटका बेला जनतासँग पुग्न आह्वान गरे ।

वास्तवमा सरकारी राहत बाड्ने नाममा स्थानीय सरकारका प्रतिनिधिहरु फाट्टफुट्ट देखिएपनि आफ्ना मतदाता मात्र खोजेर राहत बाड्दा वास्तविक पीडित जनता भने राहत पाउनबाट बञ्चित भईरहेका छन् । बाहिरी जिल्लाबाट काठमाडौं आएर पढ्ने विद्यार्थी र मजदूर अहिले सबैभन्दा प्रताडित छन् भन्दै नेता शाहीले नेकपा नेताको सम्पर्कमा नभएका वा नसक्नेहरु भोकभोकै बस्नु परिरहेकाले नै आफू यो अभियानमा लागिरहेको बताए ।

लकडाउन शुरु हुनु अघि गृह जिल्ला कालिकोट पुगेर एक हजार थान सर्जिकल मास्क वितरण गरेका उनी अझै पनि धेरै पीडितले राहत पाउन नसकिरहेको बताए । सबैलाई आफ्नो स्वास्थ्यको माया हुन्छ भन्दै उनले यस्तो बेला नेपाली कांग्रेसका नेताहरुलाई पीडित नागरिकको सम्पर्कमा आउन आग्रह समेत गरेका छन् ।