सांसदद्धय बस्नेत र श्रेष्ठसहित पूर्व आईजीपी खनालविरुद्ध अपरहण मुद्धाको जाहेरी दिने तयारी

१४ बैशाख, काठमाडौं । नेपालको राजनीतिमा ५० को दशकलाई विकृत र असंगत रुपमा चित्रण गरिन्छ । खासगरी संसदीय प्रणालीको इतिहासमा उक्त कालखण्डलाई कालो धब्बाका रुपमा लिइन्छ । कारण संसद र संसदीय व्यवस्थाकै हुर्मत लिने व्यवहार भएको अवधि थियो त्यो ।

त्रिशंकू संसद रहेको यस अवधिमा सत्ताका लागि तत्कालिन एमाले र पछि नेपाली कांग्रेस संसदीय दलका नेता शेरबहादुर देउवाले गरेको उदण्डता सदा स्मरणीय रहेछ । सांसद खरिदबिक्री, पार्टीमा टुटफुट र मन्त्री पदका लागि गरिने अनैतिक सम्झौता यस अवधिका विशेषता थिए ।

ठीक त्यही अवस्था सम्झाउने काम भएको छ अहिले, त्यो पनि दुईतिहाई मतको भनिएको सरकार प्रमुख खड्गप्रसाद ओलीबाट । आफूसँग असहमत भएका समाजवादी अध्यक्ष उपेन्द्र यादवलाई उनले सरकारबाट गलहत्याउने काम त धेरै अघि नै गरेका हुन् । तर ओलीलाई यतिले चित्त बुझेको थिएन, त्यसैले समाजवादी पार्टी नै फुटाउने गरी अध्यादेश जारी गराए । अनि समाजवादी पार्टीकी उपाध्यक्ष रेणु यादवलाई उकासेर संसदीय दल फुटाउने वातावरण तयार गरिदिए ।

१७ सदस्यीय दलमा ४० प्रतिशत पु¥याउन ७ जना सांसदको जोहो गनुपर्ने भयो । ६ जना त जुटेका थिए । तर सातौं पाउन नसक्दा अफ्ठेरो थियो । अनि उपेन्द्रसँग चित्त दुखाएर बसेका डा. सुरेन्द्र यादवलाई सार्तौ पात्र बनाउने सल्लाह भयो । त्यसको लागि प्रधानमन्त्री आफैं अग्रसर भए । महोत्तरीस्थित आफ्नै गाँउमा रहेका उनी लकडाउनका कारण काठमाडौं आउन सक्ने अवस्था थिएन ।

प्रधानमन्त्री ओलीले परिचालन गरे– कमाण्डो दस्ता । यसको जिम्मा दिइयो ओलीका विश्वासपात्रका रुपमा चिनिएका एकजना गुण्डा पृष्ठभूमिका सांसद महेश बस्नेत र मेनपावर व्यवसायी किसान श्रेष्ठ । साथ लगाइए भर्खरै प्रहरी महानिरीक्षकबाट निवृत्त भएका सर्वेन्द्र खनाल । तीन जनाको दस्ता हान्नियो महोत्तरी । अपहरणको शैलीमा ल्याइएका सांसद यादव कसोकसो होटलबाट उम्कन भ्याए । त्यसपछि उनले पार्टी अध्यक्ष उपेन्द्रलाई सम्पर्क गरे । सातौं पात्रको अभावमा समाजवादी टुक्रिनबाट त जोगियो । तर नेपाली राजनीतिमा कहिल्यै नमेटिने कालो पनि पोतियो । त्यो पनि प्रधानमन्त्री ओलीबाटै ।

नेपाली राजनीतिलाई फेरि अपराधीकरणतर्फ लैजाने ओली प्रवृत्तिलाई सदाका लागि निमिट्यान्न पार्न फेरि पनि राजनीतिक दलकै प्रतिवद्धता आवश्यक छ । त्यो प्रतिवद्धता भोलिका दिनमा अझै कसिलो र सती साल भएर उभिनुपर्ने अवस्था रहेको छ । यही प्रवृत्तिलाई निरुत्साहित गर्न आज अस्ति मात्रै एकीकृत भएको जनता समाजवादी पार्टीले महानगरीय प्रहरी परिसर टेकू काठमाडौंमा अपहरणको जाहेरी दिने तयारी भएको छ । यसबारे आज सो दलको पार्टी कार्यालयमा लामो छलफल भई अपहरण मुद्धा दर्ता गर्ने निर्णय गर्दै अहिले कानुन व्यवसायीहरुले ड्राफ्ट तयार गरिरहेको नेता शरतसिंह भण्डारीले नेपालबहस डटकमलाई जानकारी दिए ।

पार्टी नेताहरु डा. बाबुराम भट्टराई, उपेन्द्र यादव, शरतसिंह भण्डारी र राजेन्द्र महतो लगायतको उपस्थितिमा अपहरण मुद्धाको दर्ता गर्न प्रहरी परिसर काठमाडौं जाने तयारी भैरहेको छ । सांसदद्धय महेश बस्नेत र किसान श्रेष्ठ अनि पूर्व प्रहरी महानिरीक्षक सर्बेन्द्र खनाल विरुद्ध अपहरण सम्वन्धी जाहेरी दिने तयारी भएको हो ।

तर यो प्रकरणको छानविन गर्दा प्रधानमन्त्री नै तानिने अवस्था आउने भएकाले प्रहरीले चासो देखाउनेमा आशंका गर्न सकिन्छ ।