आगलागीमा १० लाखको क्षति, एक बालक घाइते

१८ बैशाख, सप्तरी । सप्तरीमा गएराती आगलागी हुँदा १० लाख बराबरको सम्पति जलेर नष्ट भएको छ भने एक बालक जलेर घाइते भएका छन । जिल्लाको सुरुङ्गा नगरपालिका ३ बिसनरिया टोलमा आगलागी हुँदा छ जनाको घर जलेर नष्ट भएपछि सो क्षति भएको हो ।

वार्ड नं. ३ का हरि मण्डलको घरबाट अचानक आगो सल्किएर आगलागी हुँदा हरि मण्डल, छिमेकी बद्री मण्डल, सन्तोष सदा, चिचाई सदा, जोगेन्द्र सदा, तिमा सदाको घर जलेका छन । उनीहरुको घरभित्र रहेको अन्नपात, लत्ताकपडा, सूनचाँदी, नगद लगायतको सरसमानसहित करिब १० लाखको सम्पति जलेको जिल्ला प्रहरी कार्यालय सप्तरीका प्रहरी प्रवक्ता प्रहरी नायब उपरीक्षक तिलक भारतीले जानकारी दिए ।

सो आगलागीमा परी बद्री मण्डलका ३ बर्षीय छोरा कृष्णा मण्डल जलेर घाइते भएका छन् । घरमा खेलिरहेको अवस्थामा आगलागी हुँदा बालकको, दुबै हात र दाहिने खुट्टा जलेको अवस्थामा तत्कालै उद्वार लाहानस्थित नरसिंह अस्पतालमा उपचार भइरहेको प्रहरीले बताइएको छ । बालकको अवस्था मध्यम रहेको छ ।

अग्निपीडित हरि मण्डलको तीन क्वीन्टल चामल, १० तोलाको पाउजु, १० तोलाको बाला र नगद एक लाख १० हजार जलेको बताइएको छ । आगलागीमा बद्री मण्डलको ५० हजार, सन्तोष सदाको चामल ६० किलो र नगद १० हजार, चिचाई सदाले कान्छी छोरीको विवाहका लागि जोहो गरेको नगद ६० हजार र दुई क्वीन्टल चामल, जोगेन्द्र सदाको छोराले विदेशबाट पठाएको नगद एक लाख र दुई आना सुन, तिमा सदाको चामल ५० किलो, धान चार मन र नगद १० हजार जलेको प्रहरीले जनाएको छ ।