तिलाठी कोइलाडी गाउँपालिकाले सुरु गरे एफएमबाट कक्षा शिक्षण

◊ धीरुभाइ

१९ बैशाख, सप्तरी । सप्तरीको तिलाठी कोइलाडी गाउँपालिकाले एफएमबाटै कक्षा सञ्चालन सुरु गरेको हो । कोरोना भाइरस (कोभिड–१९) संक्रमण फैलिन नदिन जारी लकडाउन प्रभावित विद्यार्थीलाई लक्षित गरी सप्तरीमा पहिलो पटक एफएमबाट यस्तो कक्षा शिक्षण सुरु भएको हो ।

लामो समयदेखिको लकडाउनका कारण विद्यालयहरुमा पठनपाठन बन्द रहेकोले ती विद्यार्थीहरुलाई लक्षित गरी राजविराज ६ स्थित सीएफएमसँगको सहकार्यमा ‘पाठशाला अपना घरेमे’ नामक कार्यक्रम मार्फत कक्षा शिक्षण सुरु गरेको तिलाठी कोइलाडी गाउँपालिकाका अध्यक्ष सतिशकुमार सिंहले जानकारी दिए । एफएमबाट सुरु गरिएको पठनपाठन एसइई परीक्षामा सहभागी हुने तथा कक्षा ९ बाट १० मा जाने विद्यार्थीहरुलाई लक्षित गरिएको उनले बताए ।

पछिल्लो एक महिना बढी समयदेखि विद्यार्थीहरुको पठनपाठन पूर्ण रुपमा ठप्प रहेकोले वैकल्पिक कक्षाको रुपमा एफएमबाट कक्षा शिक्षण सुरु गरिएको सो गाउँपालिका स्थित मावि बभनगामाकट्टीका अंग्रेजी विषयका शिक्षिका अरहुल कुमारी साहले बताईन् ।

विद्यालयहरुमा कक्षा शिक्षण सुचारु नभए सम्मका लागि दैनिक दुई घण्टा मातृभाषा तथा विषय अनुसार सम्वन्धित भाषामा पठनपाठन गरिने बताइएको छ । एफएममा ३० मिनेटको घण्टी अनुसार विषयगत शिक्षकहरुद्वारा शिक्षण सञ्चालन गरेको छ । दैनिक चार वटा विषयमा बिहान ११ बजेदेखि दिउँसो १ बजेसम्म एफएमबाट कक्षा शिक्षणको व्यवस्थापन गरिएको एफएमका कार्यक्रम संयोजक तथा वरिष्ठ पत्रकार शिवहरी भट्टराईले जानकारी दिए ।

जिल्लामा नौ नगरपालिका र नौ गाउँपालिका गरी १८ वटा स्थानीय तहमा सामुदायिक र संस्थागत गरी ४१३ विद्यालयहरुमध्ये माध्यमिक स्तरका १४० वटा विद्यालयहरु रहेको शिक्षा विकास तथा समन्वय इकाइ राजविराजले जनाएको छ । एमफमबाट कक्षा शिक्षण तिलाठी कोइलाडीका विद्यार्थीहरुलाई केन्द्रित गरी सञ्चालन गरेपनि एफएम सबैतिर सुनिने गरिएकोले जिल्लाका अन्य विद्यालयका विद्यार्थीहरुलाई सहयोग हुने देखिन्छ ।