लकडाउन थपिएकै दिन १७ जनामा कोरोना संक्रमण !

२४ बैशाख, काठमाडौं । लकडाउन थप १० दिन थपिएकै दिन बीरगञ्जमा एकैचोटी १७ जना कोरोना संक्रमित भेटिएका छन् । जसमा दुई महिने शिशु पनि रहेकी छन् । आज १७ जनामा कोरोना संक्रमण पुष्टि भएसँगै नेपालमा संक्रमितको संख्या ९९ पुगेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिएका छन् ।

राष्ट्रिय जनस्वास्थ्य प्रयोगशालामा गरिएको परीक्षणमा पर्साका १७ जनाको रिपोर्ट पोजिटभ आएको उनले बताए । संक्रमितहरु २ महिनादेखि ६६ वर्षसम्मका भएको पनि उनले जानकारी दिए । संक्रमण पुष्टि भएकाहरुमध्ये १० जना पुरुष र ७ जना महिला रहेको प्रवक्ता देवकोटाले जानकारी दिए ।

बुधबार नै कोशी अस्पतालमा उपचाररत ६ जना कोरोना संक्रमित भारतीय नागरिक डिस्चार्ज भएसँगै निको हुनेको संख्या २२ पुगेको छ । यद्दपि उपचाररत संक्रमित सबैको स्वास्थ्य अवस्था सामान्य रहेको मन्त्रालयले जनाएको छ ।