हात्तीको आक्रमणबाट सप्तरीमा एक महिलाको मृत्यु

२५ वैशाख सप्तरी । सप्तरी शम्भुनाथ नगरपालिका २ मा हात्ती आक्रमणबाट एक जना महिलाको मृत्यु भएको छ । मृत्यु हुनेमा ३८ वर्षीय जानकी मगर भएको प्रहरीले जनाएको छ ।

घरमा हात्ती प्रवेश गरेपछि भाग्ने क्रममा जानकी श्रीमान पेशलसँगै भोगेकी थिइन् । भाग्दै गर्दा उनलाई हात्तीले आक्रमण गरेको श्रीमान पेशलले बताए । हात्ती आक्रमणबाट गम्भीर घाइते भएकी उनलाई उपचारका लागि राजविराजस्थित गजेन्द्रनारायण सिंह अस्पताल लैजाने क्रममा बाटोमै मृत्यु भएको पेशलले बताए । मृतकको शव परीक्षणका लागि यसै अस्पतालमा राखिएको छ ।

हात्तीले लक्ष्मण मण्डल र बलराम ईसरको घरसमेत भत्काइदिएको स्थानीयले बताएका छन् । डिभिजन वन कार्यालय सप्तरीका प्रमुख सन्तोषकुमार झाले मृतकको परिवारलाई तत्कालै किरिया खर्चवापत ५० हजार उपलब्ध गराउने र क्षतिपूर्तिवापत सरकारी पक्षबाट दिइने १० लाखका लागि कोशी टप्पु वन्यजन्तु आरक्षमा अबिलम्ब प्रक्रिया अगाडि बढाइने बताए ।