संक्रमणबाट बच्न ज्येष्ठ नागरिकलाई घरमै स्वास्थ्य सेवा

२५ बैशाख, प्युठान । कोरोना संक्रमणबाट बच्नका लागि सरकारले गरेको लकडाउनका समयमा पनि जिल्लामा ८४ वर्ष पुगेका नागरिकलाई घरमै पुगेर स्वास्थ्य सेवा दिइएको छ । प्युठानका नौ वटै स्थानीय तहका ज्येष्ठ नागरिकलाई घरमै पुगेर स्वास्थ्य सेवा दिइएको स्वास्थ्य कार्यालय प्युठानका प्रमुख विशाल सुवेदीले बताए ।

जिल्लाका ६४ स्वास्थ्य संस्थामार्फत ज्येष्ठ नागरिकसँगै दीर्घरोगीको पनि जाँच गरिएको छ । स्वास्थ्यकर्मीले सुरक्षित तवरले ज्येष्ठ नागरिकलाई नेपाल सरकारमार्फत प्राप्त भएको निः शुल्क औषधि तथा जाँच सेवा परामर्श दिइँदै आएको सुवेदीले बताए। प्रदेश सरकार, सामाजिक विकास मन्त्रालयअन्तर्गत स्वास्थ्य कार्यालय प्युठान मातहतका स्वास्थ्य संस्थामार्फत यो सेवा सञ्चालन गरिएको हो । सेवाअन्तर्गत महिनामा कम्तीमा दुई पटक ज्येष्ठ नागरिकको स्वास्थ्य परीक्षण गरिन्छ ।

प्युठान ५ जुम्रीकाढाँ पातलकटेरीकी ९१ वर्षीया मनि खड्काले सबै बन्द भएको समयमा पनि यसरी सेवा गर्न स्वास्थ्यकर्मी आएकोमा खुशी व्यक्त गरे। स्थानीय तहका ६४ वटा वडामा एक हजार २०८ जना ८४ वर्ष पुगेका नागरिक छन् । स्थानीय तहमा रहेका स्वास्थ्यकर्मीबाटै तिनको स्वास्थ्य परीक्षणको व्यवस्था मिलाइएको छ ।