सप्तरीका कोरोना संक्रमित युवकलाई अस्पताल ल्याउने तयारी

♦ धीरुभाई

२९ बैशाख, सप्तरी । सप्तरीमा भेटिएका कोरोना संक्रमति यूवकलाई राजविराजस्थित गजेन्द्रनारायण सिंह अस्पतालमा ल्याउने तयारी भईरहेको छ ।

जिल्लाको डाक्नेश्वरी नगरपालिका वडा नं ३ तरही, हटेलका १८ वर्षीय एक युवकमा कोरोना संक्रमण पाइएको छ । उनको स्वास्थ्य अवस्था सामान्य रहेको छ । आज सोमबार अपरान्ह कोरोना संक्रमण भेटिएपछि तत्कालै अस्पतालको आइसोलेशनमा राख्ने तयारी भइरहेको गजेन्द्रनारायण सिंह अस्पतालका मेडिकल सुपरिटेन्डेन्ट डा. चुमनलाल दासले जानकारी दिए ।

सुनसरी जिल्लाको धरानस्थित बीपी कोइराला स्वास्थ्य विज्ञान प्रतिष्ठानको प्रयोगशालामा गरिएको परीक्षणमा उनको कोरोना पुष्टि भएको हो । पाँच दिन अघि गत २५ गते स्वास्थ्य कार्यालय सप्तरीले सो क्षेत्रको क्वारेन्टाइनमा समय अवधि पूरा गरेका उनको पीसीआर परीक्षणका लागि स्वाब संकलन गरेको थियो ।

गत बैशाख ९ गते चितवनमा मजदुरी गर्ने उनीसहित १३ जना पैदल हिँडेर सप्तरी आइपुगेका उनीहरुलाई पातोस्थित चन्द्रकान्त माविको क्वारेन्टाइनमा राखिएको सो वार्डका अध्यक्ष प्रदीप साहले जानकारी दिए । क्वारेन्टाइनमा रहँदा उनको स्वास्थ्य अवस्था सामान्य रहेको बताइएको छ ।

१९ दिन क्वाराइन्टेनमा बसेका उनी गएराती मात्रै घर पुगेको एक स्थानीयले बताएका छन । यता संक्रमित भेटिएपछि थप कदमबारे जिल्ला संकट व्यवस्थापन समितिको तत्कालै बसेको बैठकले कुनै निर्णय नगरेको भएपनि संक्रमित बसेको क्वारेन्टाइन, घर, टोल बस्तीको बस्तुस्थिति अध्ययनपछि मात्र निर्णय लिने सहमतिपछि त्यसतर्फ समितिका पदाधिकारी गएकोे जिल्ला प्रशासन कार्यालय सप्तरीका सूचना अधिकारी आनन्द ठाकुरले जानकारी दिए ।