के तपाईलाई थाहा छ ! मदिराको उचित मात्रा कति हाे ?

२९ बैशाख, काठमाडौं । विश्वभर कोरोना भाइरसले महामारी लिइरहेको बेला नेपाल सरकारले लकडाउन जारी गरेको छ । बन्दाबन्दीमा दिन कटाउनै गाह्रो । दिनभर के गर्दै बस्ने ? कतिपयका लागि बहाना बनेको छ, मदिरा पिउने । हुन त अहिले मदिरा त्यति सहजै उपलब्ध छैन । तेसो त बयस्कलाई मदिराबाट छुटाउने मौका पनि हो यो लकडाउन ।

कतिले त मदिरा छाडे पनि होलान् । तर, सबैको हकमा त्यस्तो नहोला ।  घरमै बस्न पाइने भएकाले वा कामकाजका लागि बाहिर निस्कनु नपर्ने भएकाले कतिपयलाई मदिरा पिउने बहाना मिलेको छ । मदिरा पिउनेहरू अनभिज्ञ हुँदैनन् कि यो स्वास्थ्यका लागि हानीकारक छ । स्वास्थ्यका लागि मात्र होइन, परिवार, बालबच्चा सबैका लागि हानीकारक छ ।

त्यसैले सम्भव भएसम्म त मदिरा त्यागेकै उत्तम हुन्छ । मदिरा पिउने नै हो भने दैनिक कति पिउने ? यो कुरा तपाईको स्वास्थ्यमा पनि निर्भर रहन्छ । स्वस्थ्य एवं तन्दुरुस्त व्यक्ति र रोगी व्यक्तिका लागि मदिराको मात्रा एकनास हुँदैन । स्वास्थ्यमा कुनै समस्या भएका व्यक्तिहरूका लागि थोरै मात्रामा पिइने मदिरा पनि निकै हानीकारक हुन सक्छ ।

मदिरा कति पिउने ?

स्वास्थ्य विज्ञहरूको यसमा एउटै राय छ, जति मदिरा पिए पनि शरीरलाई हानि गर्छ । अर्थात् उचित मात्रामा पिउँदैमा शरीरलाई हानि हुँदैन भन्ने होइन । थोरै मदिरा सेवन गर्दा पनि त्यसको नकारात्मक असर शरीरमा पर्छ। खासगरी कलेजोको लागि मदिरा अत्यन्तै घातक हुन्छ । तर, थोरै मदिरा पिउँदा पनि स्वास्थ्यमा हानी गर्छ भनेर त्यसको मात्रा बढाउनु अरू घातक हुन्छ । मदिराको मात्रा जति बढाउँदै लान्छौं, खतराको स्थिति पनि उति नै बढेर जान्छ । यद्यपि पिउने नै भएपछि त्यसबाट धेरै क्षति व्यहोर्नु नपरोस् भनेर मात्रा निर्धारण गरिएको छ ।

जान्ने पर्ने उपयोगी कुरा के हो ?

यदि मदिरा पिउने नै हो भने मदिरा पिउनुअघि भरपेट पानी वा तरल पदार्थ पिउनुहोस् । यसले गर्दा मदिराको सोझो असर कम पर्छ । पानी पिएर मदिरा सेवन गरेपछि पेट खराब हुने वा ह्याङओभर हुने समस्या रहँदैन । धेरैले भन्छन् मदिरासँग स्न्याक्स सेवन गर्नुपर्छ । स्न्याक्सको रुपमा मासुजन्य परिकार, भुजिया, चिप्स आदि हुनेगर्छ । यस किसिमको स्न्यान्ससँग मदिरा पिउनु अरू हानिकारक हुन्छ । बरु सलाद वा फलफूलसँग सेवन गर्दा उचित हुन्छ ।