संक्रमित युवकको छिमेकी बर्साइन बजार त्रासले पूर्ण लकडाउन

♦ धीरुभाइ

३०, बैशाख सप्तरी । कोरोना संक्रमित युवकको छिमेकी बोदेबर्साइन नगरपालिकालाई तीन दिन पूर्ण लकडाउन गरिने निर्णयसँगै कार्यान्वयन गरिएको छ । सप्तरीको डाक्नेश्वरी नगरपालिका वडा नम्बर ३ को हटैलका १८ वर्षीय युवकको छिमेकी बोदे बर्साईन नगरपालिका वडा नम्बर ५ स्थित बर्साईन बजारलाई मंगलबारदेखि तीन दिनसम्म लकडाउनको पूर्ण पालन गर्ने निर्णय गरेको छ ।

बजारको पूर्वमा पेट्रोल पम्प, उत्तर तथा पश्चिममा चन्द्रा मावि, दक्षिणमा हैंठीसम्म बन्द गर्ने सहमति भएको छ । औषधि पसलबाहेक किराना पसल, तरकारी हटियासहित सम्पूर्ण पसल, सवारीसाधन, हिडडुल बन्द गरिने निर्णय भएको वडा नम्बर ५ का अध्यक्ष मो. मजिवुर रहमानले जानकारी दिए ।

ईलाका प्रहरी कार्यालय बोदे बर्साईनका कार्यालय प्रमुख प्रहरी सहायक निरीक्षक चन्द्रबहादुर केरूङ उपस्थितिमा बोदे बर्साईन नगर ब्यापार समितिको बैंठकले बर्साईन बजारमा पूर्ण रूपमा लकडाउनको कार्यान्वयन गराउने निर्णय गरेको स्थानीय लोकेन्द्रप्रसाद यादवले जानकारी दिए ।

सो निर्णयको पूर्ण कार्यान्वय गराउन बर्साईन बजारको चारै सीमामा प्रहरी परिचालन गरेको छ । नगर ब्यापार समिति अध्यक्ष देवनारायण साह अध्यक्षतामा बसेको बैठकमा उपाध्यक्ष राधा भगत, सचिव अनिल सिंह लगायत ब्यापारीहरूको उपस्थितिमा उक्त निर्णय भएको हो । छिमेकी नगरपालिका डाक्नेश्वरीमा कोरोना संक्रमण पुष्टि भएपछि सतर्कता अपनाउन यस्तो कदम चालिएको व्यापारीहरु बताउँछन ।