गैडहवा गाउँपालिका ५ दिन पूर्णरुपमा सिल

१ जेठ, रुपन्देही । कोरोना संक्रमण देखिएपछि गैडहवा गाउँपालिका बन्द गरिने निर्णय भएको छ । बुधबार दश जनामा कोरोना संक्रमण पुष्टि भएपछि आज बसेको विपद् व्यस्थापन समितिको बैठकले शुक्रबारदेखि यही जेठ ५ गतेसम्म पूर्णरुपमा सिल गर्ने निर्णय गरेको हो ।

पालिकामा सवारी आवागमन, व्यवसाय सञ्चालन र आवतजावतमा पूर्णरुपमा रोक लगाइएको पालिकाका अध्यक्ष बच्छुलाल केवटले जानकारी दिए । मंगलबार रुपन्देहीको भैरहवास्थित प्रादेशिक प्रयोगशालामा गरिएको परीक्षणमा दश जनामा कोरोना भाइरस पोजेटिभ देखिएको थियो । उनीहरु एक हप्ताअघि भारतको मुम्बईबाट आएका थिए ।