सरकारले डा.रुना झासहित ६ जनालाई सोध्यो स्पष्टीकरण, कारवाही गर्ने तयारी

१ जेठ, काठमाडौं । सरकारले आफूलाई थाहै नदिई कोरोना संक्रमित पहिलो नेपाली युवाको भाइरस जेनेटिक विदेशी संस्थालाई अनुसन्धान गर्न दिएको भन्दै जनस्वास्थ्य प्रयोगशालाकी निर्देशक डा.रुना झासहित ६ जनालाई कारवाही गर्ने तयारी गरेको छ ।

स्वास्थ्य अनुसन्धान परिषदले डा. रुना झासहित इपिडिमियोलोजी तथा रोग नियन्त्रण महाशाखाका निर्देशक डा.बासुदेव पाण्डे, पूर्वनिर्देशक डा. विवेकलाल कर्ण र शुक्रराज ट्रपिकल तथा सरुवा रोग अस्पतालका निर्देशक डा.अनुप बास्तोलालाई लिखित स्पष्टीकरण सोधेको हो । त्यस्तै राष्ट्रिय प्रयोगशालाकै डा. रन्जित साह र हेमन्त चन्द्र ओझालाई पनि स्पष्टीकरण सोधिएको छ ।

वैशाख २९ गतेको पत्रमा सोधिएको स्पष्टीकरण एक साताभित्र पेश गर्न भनिएको छ । विदेशीहरुलाई समेत संलग्न गरी माइक्रोबायालोजी रिसोर्स अनाउन्सेमन्टमा प्रकाशन गरेको अनुसन्धान लेख गैरकानुनी भएकाले कारवाही गर्ने आशयसहितको पत्र उनीहरुलाई थमाइएको स्रोतले जनाएको छ ।

नेपाल स्वास्थ्य अनुसन्धान परिषद ऐन २०४७ बमोजिम कुनै पनि मानव स्वास्थ्यसँग सम्बन्धित अनुसन्धान कार्य गर्दा परिषदको पूर्वस्वीकृत लिनुपर्छ । तर, यो ६ जनाको टोलीले स्वीकृति नलिई अनुसन्धान कार्य सम्पन्न गरी वैज्ञानिक लेख समेत प्रकाशन गरेको पाइएकाले कारवाही प्रक्रिया अघि बढाइएको हो ।

रुना झा नेपालमा कोरोना परीक्षणको नेतृत्व गरेको भन्दै संयुक्त राष्ट्र संघको मूल्यांकनमा विश्वकै उत्कृष्ट ५ महिलामा परेकी थिइन । तर नेपालको नाम राखेकी उनै झालाई स्पष्टीकरण सोधेपछि सरकारको आलोचना झन् बढ्ने अनुमान गरिएको छ । यसअघि डा.शेरबहादुर पुनलाई स्पष्टीकरण सोध्दा सरकारको कडा आलोचना भएको थियो ।