टोखाले ५०० को आरडीटी र पीसीआर परीक्षण गर्ने

१ जेठ काठमाडौं ।  काठमाडौंको उत्तरी क्षेत्रमा रहेको टोखा नगरपालिकाले विदेशबाट आएका व्यक्तिको आरडीटी र पिसिआर परीक्षण गर्ने भएको छ । विश्वव्यापी रुपमा फैलदै गएको कोभिड–१९ को सङ्क्रमण नेपालमा बढ्न थालेपछि सो नगरपालिकाले आरडीटी र पीसीआर परीक्षण गर्न लागेको हो ।

नगरपालिकाका प्रमुख प्रकाश अधिकारीले भर्खरै विदेशबाट आएका र विभिन्न जिल्लाबाट केही दिन पहिला काठमाडौं भित्रिएर टोखामा बसोबास गर्दै आएका व्यक्तिको आरडीटी र पीसीआर परीक्षण गर्न लागिएको जानकारी दिए ।“नगरपालिकाभित्र कार्यरत स्वास्थ्यकर्मी र जनप्रतिनिधीको आरडीटी र पीसीआर परीक्षण गर्न लागेका छौँ”, नगरप्रमुख अधिकारीले भने । जनप्रतिनिधि, स्वास्थ्यकर्मी, भर्खरै विदेशबाट आएका, विभिन्न जिल्लाबाट केही दिन पहिले टोखा आएका ५०० व्यक्तिको आरडीटी परीक्षण गर्न लागिएको हो । २०० व्यक्तिको पिसिआर परक्षिण गर्ने नगरपालिकाले जनाएको छ ।

यस्तै, नगरपालिकाभित्र दैनिक ज्याला मजदूरी गरेर गुजारा चलाउँदै आएका दुई हजार व्यक्तिलाई दैनिक खाना खुवाउँदै आएको छ । नगरपालिकाभित्रका स्टार टाउन र तिलिङ्गाटार माध्यमिक विद्यालयमा खाना पकाएर प्याकिङ गरेर श्रमिकको घरमा लैजाँदै आएको नगरप्रमुख अधिकारीले बताए ।