मुम्बईबाट दुई साता अघि नरैनापुर आएका थिए, कोरोनाले मृत्यु भएका युवक

४ जेठ, बाँके । कोरोनाबाट मृत्यु भएका बाँके नरैनापुरका २५ वर्षीय युवक मुम्बईबाट बुधबार मात्र नेपाल आइपुगेको पाइएको छ ।

नरैनापुरको दीपेन्द्र मावि भोजभगवानपुरको क्वारेन्टाइनमा बसेका नरैनापुर–५ नयाँ बस्तीमा उनको आइतबार बिहान मृत्यु भएको हो। उनको कोरोना परीक्षण रिपोर्ट पोजेटिभ आएको स्वास्थ्य तथा जनसंख्या मन्त्रालयले जनाएको छ ।

समाचार स्रोतका अनुसार उनी मुम्बईबाट दुई साता लामो पैदल यात्रा गरेर आएका थिए । लामो पैदल हिडेर आउँदा उनका खुट्टा सुन्निएको थियो । शनिबार राति उनलाई एक्कासी ज्वरो थियो । स्वासप्रश्वासमा समस्या भएपछि एम्बुलेन्स खोज्दा खोज्दै उनको क्वारेन्टाइनमा मृत्यु भएको हो । तर क्वारेन्टाइनमा बसेकाहरुले समयमा उपचार नपाएर उनको मृत्यु भएको बताएका छन् ।

क्वारेन्टाइन व्यवस्थापन गरिरहेका नरैनापुर गाउँपालिका–६ का वडा सचिव जीवनलाल यादव पनि सम्पर्कविहीन भएको उनीहरुको आक्रोश छ । विहान १० बजेसम्म गाउँपालिकाका सूचना अधिकारी लक्ष्मीकान्त मिश्राबाहेक स्वास्थ्यकर्मी र अन्य कर्मचारी घटनास्थलमा नपुगेको बाँकेका पत्रकार खगेन्द्र दाहालले बताए ।

क्वारेन्टाइनमा बसेकाहरुले असुरक्षित भएको भन्दै घर पठाउन माग गरेका छन् । ‘यो क्वारेन्टाइन असुरक्षित छ, हामीलाई घर नपठाए अन्दोलन गर्छौं’ क्वारेन्टाइनमा बसेका एक युवकले भनेका छन् ।