शेयर बजार जेठ २० गतेसम्म बन्द हुने

५ जेठ, काठमाडौं । सरकारले लकडाउन अवधि थपेसँगै शेयर बजार पनि बन्द हुने भएको छ । जेठ २० गतेसम्म बजार पनि बन्द गरिने निर्णय भएको नेप्सेले जनाएको हाे । यसअघि जेठ ५ गतेसम्म बजार बन्द भनिएको थियो ।

लकडाउनलाई निरन्तरता दिइएकाले बजार पनि बन्द गर्ने नेप्से सञ्चालक समितिले निर्णय गरेको हो । यसअघि लकडाउनकै बीचमा पनि २ दिन बजार खुला गरिएको थियो । तर ती दिनहरुमा शेयर कारोबार प्रभावकारी हुन सकेन ।

आम लगानीकर्ताको सहभागिता पनि भएन । त्यसले केबल सूचक घटाउने काम मात्र गरेको भन्दै आम लगानीकर्ताले व्यापक विरोध जनाएपछि पुनः लकडाउन अवधि अर्थात जेठ ५ गतेसम्मलाई बजार बन्द गरिएको थियो । तर सरकारले फेरि लकडाउन बढाएपछि नेप्सेले पनि सोही म्यादसम्म कारोबार बन्द राख्ने निर्णय गरेको हो ।