कालिमाटीमा कार्यरत २ जना सुरक्षाकर्मीलाई कोरोनाको संक्रमण,६ वृत्त तथा प्रभाग सिल

७ जेठ, काठमाडौं । उपत्यकामा कार्यरत २ जना सुरक्षाकर्मीलाई पनि कोरोना भाइरसको संक्रमण देखिएको छ । नेपाल प्रहरीका अनुसार महानगरीय प्रहरी वृत्त, कालिमाटीमा कार्यरत एकजना सई र जवानलाई कोरोनाको संक्रमण पोजेटिभ देखिएको हो ।

 यसबारे स्वास्थ्य मन्त्रालयले मंगलबार यसबारे प्रहरीलाई जानकारी गराइसकेको छ । उनीहरुको चार दिनअघि पीसीआर परीक्षण गरिएको थियो ।

मंगलबार दुवै प्रहरी कर्मचारी ब्यारेकमै बसेका थिए । ब्यारेकमा ९० जना बस्ने गरेका छन् । त्यसपछि उक्त प्रभागमा कार्यरत झण्डै ९० जना प्रहरीको पीसीआर गर्न स्वास्थ्य मन्त्रालयले तयारी थालेको छ ।

सुरक्षाका लागि सडकमा खटिएका ती प्रहरीमा कोरोना पोजेटिभ देखिएपछि स्थानीय पनि त्रसित छन् । प्रहरीले लगत्तै कालिमाटी प्रहरी बृत्तलगायत नजिकैका अरु ६ वृत्तलाई सिल गरेको छ । प्रहरी बृत्तसँगै रहेको ट्राफिक प्रहरी प्रभाग र महिला प्रहरी सेललाई तत्कालै सिल गरिएको काठमाडौं प्रहरी प्रभागका एसएसपी श्यामलाल ज्ञवालीले जानकारी दिएका छन् ।

यसका साथै, कालिमाटी प्रभाग अन्तर्गतका बल्खु, कलंकी र स्यूचाटार प्रभाग पनि सिल गरिएको उनले बताए । स्रोतका अनुसार, संक्रमित दुबै प्रहरी हिजो राति पनि ब्यारेकमै बसेका थिए ।

यसैबीच हिजै भक्तपुरका एक जना संक्रमित भनिएका पुरुष काठमाडौं महानगरपालिकाको गाडी चालक रहेको बुझिएको छ । संक्रमित ती पुरुष भक्तपुर ५ का स्थायी बासिन्दा हुन् । उनी बस्ने क्षेत्रको पनि हिजै साँझ सिल गरिएको छ । साथै, संक्रमितलाई भने हिजै अस्पताल पु¥याइएको छ ।