धनकुटामा नेपाल प्रहरी २ जना जवानलाई कोरोना संक्रमण 

८ जेठ, काठमाडौं । धनुकटा कोरोना संक्रमित भनिएका व्यक्ति नेपाल प्रहरीका जवान भएको खुलेको छ । जिल्ला अस्पताल, धनकुटामा कार्यरत रहेका बेला उनलाई संक्रमण सरेको हुनसक्ने आशंका गरिएको छ ।

स्वास्थ्य मन्त्रालयका सह–प्रवक्ता समिरकुमार अधिकारीले बिहीबार बिहान ६ः५० बजे धनुकटाका एक जना व्यक्तिमा संक्रमण पाइएको पुष्टि गरेका थिए ।

जिल्ला प्रशासन कार्यालय, धनकुटाका अधिकृत जयराम श्रेष्ठका अनुसार संक्रमित प्रहरीलाई कोभिड अस्पताल विराटनगर पठाइएको छ । उनका अनुसार, संक्रमित प्रहरी अस्पतालमा उपचाररत एक जना बलात्कृत बालिकाको सुरक्षामा खटिएका थिए ।

पीडितको पनि कोरोना भाइरस जाँच्न पीसीआर परीक्षण गरिसकिएको छ । यद्यपि, रिपोर्ट आइसकेको छैन । उनीसँगै खटिएका अर्का एक जना प्रहरीलाई पनि संक्रमण पुष्टि भइसकेको छ । हालसम्म धनकुटामा ७ जनामा कोरोना संक्रमण देखिएको छ । तीमध्ये ४ जना स्वास्थ्यकर्मी, एक जना स्वास्थ्यकर्मीका परिवार र दुई जना प्रहरी छन् ।