एकैदिन ३३ संक्रमित भेटिएको झापाको कचनकवल गाउँपालिका शिल

८ जेठ, झापा । एकैदिन ३३ जना कोरोना संक्रमित भेटिएको झापाको कचनकवल गाउँपालिका शिल गरिएको छ । जिल्ला प्रहरी कार्यालय, झापाका प्रमुख एसपी कृष्ण कोइरालाले संक्रमितको संख्या बढ्दै जाँदा गाउँपालिका शिल गरिएको पुष्टि गरे ।

उनीहरु सबै भारतबाट आएकाले अरुलाई घरबाहिर निस्कन दिइएको छैन । क्वारेन्टाइनमा राखिएकामध्ये १ सय जनाको स्वाब संकलन गरेर परीक्षणका लागि पठाइएको थियो । तीमध्ये हालसम्म ३३ जना संक्रमित भेटिएका हुन् । संक्रमित सबै भारतबाट आएका व्यक्ति हुन् ।

क्वारेन्टाइनमा राखिएका सबैको कोरोना परीक्षण गरिएको छ भने सामाजिक दुरी कायम राखिएको छ । समुदायमा कोरोना फैलिन नदिन गाउँपालिका नै शिल गरिएको प्रहरीले जनाएको छ ।