मनमोहनमा भर्ना भएकी एक महिलामा संक्रमण, कन्ट्याक ट्रेसिङ सुरु

१० जेठ, काठमाडौं । उपचारका लागी भर्ना भएकी महिलामा काेराेना संक्रमण भेटिएपछि मनमोहन सेन्टरमा कन्ट्याक ट्रेसिङ सुरु भएकाे छ । चिकित्साशास्त्र अध्ययन संस्थान ‘आइओएम’को मनमोहन कार्डियोभास्कुलर एण्ड ट्रान्सप्लान्ट सेन्टरमा भर्ना भएकी एक महिलामा संक्रमण भेटिएपछि कन्ट्याक ट्रेसिङ सुरु भएको हाे ।

मनमोहन अस्पतालमा जेठ ६ गते भर्ना भएकी हेटौडाकी एक ५४ वर्षे महिलामा शुक्रबार साँझ कोरोना पोजेटिभ देखिएको थियो। लगत्तै ति महिलालाई गणेशमानसिंह भवनको कोभिड वार्डमा सारिसकेको छ।

महिलासंगै उपचाररत वार्डमा कार्यरत चिकित्सक नर्स, बिरामी र तिनीहरुको आफन्तलाई कन्ट्याक ट्रेसिङ गर्ने काम भइरहेको अस्पतालका कोभिड फोकल पर्सन डाक्टर रञ्जन सापकोटाले बताए । डाक्टर सापकोटाका अनुसार क्याथल्याबसहित कार्डियोलोजी सेवा अर्को सूचना नआउज्जेलको लागि स्थगित गरिएको छ भने संक्रमितसंगै वार्डमा राखिएका बिरामीलाई सेपरेट गरिएको छ।

अहिले स्वास्थ्यकर्मी, बिरामी र कुरुवाहरु सबै गरेर कम्तीमा ३० देखि ४० जनासम्म संक्रमितको प्राइमरी र सेकेण्डरी सम्पर्कमा आएको हुन सक्ने अस्पतालले बताएकाे छ ।  इपिडिमियोलोजी तथा रोग नियण्त्रण महाशाखाका विज्ञ चिकित्सक, महाराजगञ्ज क्याम्परको पब्लिक हेल्थ एक्सपर्ट र अस्पतालकै चिकित्सकहरु मिलेर कन्ट्याक ट्रेसिङ सुरु गरेको डाक्टर सापकोटाले बताए।