नेपालमा कोरोना संक्रमितको संख्या ६७५ पुग्याे

१२ जेठ, काठमाडौं । नेपालमा कोरोना भाइरसको संक्रमण हुनेको संख्या ६७५ पुगेको छ । स्वास्थ्य तथा जनसंख्या मन्त्रालयका अनुसार सोमबार बिहान थप ७२ जनामा कोरोना भाइरसको संक्रमण पुष्टि भएको हाे ।

मन्त्रालयका सह–प्रवक्ता डा. समिरकुमार अधिकारीले दिएको जानकारी अनुसार देशका विभिन्न प्रयोगशालामा भएका परीक्षणमा नयाँ संक्रमित पुष्टि भएका हुन् । नयाँ संक्रमित हुनेमा बारा र रौतहटका धेरै छन् । आज ७२ जना थपिएसँगै नेपालमा केरोना (कोभीड–१९) संक्रमितको संख्या ६७५ पुगेको छ । स्वास्थ तथा जनसंख्या मन्त्रालयका अनुसार राष्ट्रिय जनस्वास्थ प्रयोगशाला, काठमाडौंमा ३७ जना, वीपी कोइराला स्वास्थ विज्ञान प्रतिष्ठान धरानमा २ जना, राप्ती स्वास्थ विज्ञान प्रतिष्ठान दाङमा ५ जना, किटजन्य रोग अनुसान्धान तथा तालिमकेन्द्र, हेटौंडामा २१ जना, भेरी अस्पताल नेपालगंजमा ५ जना र प्रदेश अस्पताल सुर्खेत/पशुपंक्षी रोग अन्वेषण प्रयोगशाला सुर्खेतमा २ जना गरी जम्मा ७२ जना आज नयाँ संक्रमणको पुष्टि भएको हो । संक्रमितहरु धनुषा, कपिलवस्तु, काठमाडौं, बारा, रौतहट, सप्तरी, बाँके, दैलेखका रहेको पनि मन्त्रालयले पुष्टि गरेको छ ।

माथि उल्लेखित संस्थाहरूमा परिक्षाण गिरएका बिरामीहरूमा रौतहटका २६ तथा बाराका २३ जनामा संक्रमण पुष्टि भएको हो । रौतहटको फरदहवा–२, ६ र ८ तथा इशनाथ–२ का १८ देखि ५३ वर्षसम्मका २६ पुरुषमा संक्रमण पुष्टि भएको हो । यस्तै बाराको गडीमाइ नगरपालिकाका १८ देखि ५० वर्षसम्मका २१ पुरुषमा संक्रमण पुष्टि भएको मन्त्रालयले जनाएको छ । यस्तै बाराको कलैया–१ कोटवालीका २५ र ३२ वर्षका पुरुषमा पनि संक्रमण देखिएको छ ।

सोमबार संक्रमण पुष्टि हुनेमा धनुषाको नगराइन–३ का ३०, ३१ र ४५ वर्षका पुरुष, कपिलवस्तुको शिवराज नगरपालिका–४, ५ र ६ का १९, २० र २३ वर्षका पुरुष, काठमाडौंको टोखा–३ र ६ तथा बुढानिलकण्ड–३ का २७, ४१ र ३७ वर्षका पुरुष, सप्तरीको डाक्नेधरी गाउँपालिकाका २२ र ३४ वर्षका पुरुष रहेका छन् ।

यस्तै बर्दियाको बासगढी–९ का २५ वर्षे युवा, बाँकेको दुधवा–२ र राप्ती सोनारी–७ का १६ देखि २४ वर्षका चार युवा तथा दैलेखको चार युवा र एक युवतीमा संक्रमण पुष्टि भएको हो ।

टाेखाका संक्रमितलाई अस्पताल राख्ने तयारी

काठमाडौंको टोखा नगरपालिकामा भेटिएका कोरोना भाइरस संक्रमित किराना पसले भएको खुलेको छ । स्वास्थ्य तथा जनसंख्या मन्त्रालयकाअनुसार सोमबार थपिएका ७२ संक्रमित मध्ये दुई जना टोखाका हुन् । टोखा नगरपालिका ३ र ६ का २७ वर्षीय र ४१ वर्षीय दुवै पुरुषमा संक्रमण पुष्टि भएको हो । संक्रमित एक जना भने किराना पसेले हुन् । स्रोतका अनुसार दुवै संक्रमितलाई अस्पताल पठाउने तयारी भइरहेको छ । केही दिन अगाडि टोखा नगरपालिकाले पनि तरकारी, औषधि, किराना पसल सञ्चालन गर्ने तथा जनप्रतिनिधि गरेर ३०६ जनाको थ्रोट स्वाब संकलन गरेर परीक्षणका लागि पठाएको थियो । जसमध्ये दुई जनाको रिपोर्ट पोजेटिभ देखिएको छ ।