नेपालमा कोरोनाका कारण पाँचौ व्यक्तिको मृत्यु

१४ जेठ, काठमाडौं । कोरोना भाइरसको संक्रमणले नेपालमा पाँचौ व्यक्तिको मृत्यु भएको छ । ललितपुर महानगरपालिका २२ का ५७ वर्षीय पुरुषको किष्ट अस्पतालमा कोरोना संक्रमणका कारण बुधबार साँझ निधन भएको हो ।

याेसँगै नेपालमा कोरोनाका कारण मृत्यु हुनेको संख्या पाँच पुगेको छ । यसअघि सिन्धुपाल्चोक, बाँके, गुल्मी र पर्सामा एक एक जनाको कोरोनाले मृत्यु भएको थियो ।

बुधबारै आएको कोरोना परीक्षणको रिपोर्ट पनि पोजेटिभ नै रहेको स्वास्थ्य कार्यालय, ललितपुरले जनाएको छ । कार्यालयका प्रमुख डा. खगेश्वर गेलालका अनुसार ११ गते अल्कोहलिक लिभर डिजिज भन्दै उनलाई पाटन अस्पताल भर्ना गरिएको थियो ।

तर त्यहाँ आईसीयू नभएको भन्दै किस्ट अस्पतालमा रिफर गरिएको थियो । अस्पतालले १२ गते नै उनको थ्रोट स्वाब संकलन गरेर परीक्षणका लागि पठाएको थियो । उनको रिर्पोट आज आएपछि कोरोनाले मृत्यु भएको पुष्टि भएको हो ।स्वास्थ्य तथा जनसंख्या मन्त्रालयले यसको औपचारिक पुष्टि गरेर घोषणा गर्न भने बाँकी छ ।