एमसीसी प्रकरणमा ओलीको जित

१७ जेठ, काठमाडौं । लामो समयदेखि विवादमा ल्याइएको अमेरिकी मिलेनियम च्यालेञ्ज एमसीसीलाई संसदबाट अनुमोदन गराउने प्रधानमन्त्री केपी ओलीको रणनीति आज लगभग सफल भएको छ । संसदले अनुमोदन नगरी कार्यान्वयन गर्न नमिल्ने भनिएको एमसीसीलाई अब पार्टी तहमा छलफलै नगरी निर्णयमा पु¥याइने भएको छ ।

आज बिहान बसेको पार्टी सचिवालय बैठकले एमसीसी लामो समयदेखि संसदमा प्रवेश गरिसकेको विषय भएको भन्दै यसबारे छिनोफानो गर्ने काम स्वयं संसदलाई नै छाडिदिएको हो । आजको बैठकमा प्रधानमन्त्री ओलीले असन्तुष्ट नेताहरुको मान राख्नका लागि संसदले पास नगरेसम्म एमसीसी प्रक्रिया अगाडि नबढाइने आश्वासन दिए । जबकी दुईवर्ष अघिबाटै एमसीसी कार्यान्वयनमा आईसकेको छ । उक्त परियोजना अन्तर्गत कार्यालयसमेत स्थापना भई काम भईरहेको छ ।

आज बसेको सचिवालय बैठकमा नेताहरु आक्रोशित भए, तर आज आमन्त्रण गरिएका अर्थमन्त्री डा. युवराज खतिवडाप्रति । प्रधानमन्त्री ओली सधैं भन्दा आज शान्त देखिएका थिए । उनले खासै बोलेनन् । बरु आजको बैठकमा उठेका प्रश्नको जवाफ अर्थमन्त्री खतिवडाले नै दिएका थिए ।

नेता बामदेव गौतम र भीम रावलले अर्थमन्त्रीको झाँको झार्ने प्रयास गरेका थिए । पार्टीमा छलफल नै नगरी बजेटमा किन समावेश गरेको भन्दै अर्थमन्त्रीसँग स्पष्टीकरण लिन खोजियो । साथै, अर्का आमन्त्रित परराष्ट्रमन्त्री प्रदीप ज्ञवालीले पनि अन्तर्राष्ट्रिय सम्बन्ध र कूटनीतिको सम्मान गर्न एमसीसीबारे अन्तिम निर्णय गर्न संसदलाई नै छाडिदिनुपर्ने तर्क गरे ।

साँच्चै भन्ने हो भने एमसीसी कार्यान्वयनमा आईसकेको छ, अब हामी यसबाट पछाडि फर्कन सक्ने अवस्था छैन– ओली निकट एक नेताले भने । यस्तै तर्क गरिएपछि नेताहरु चूप बसेका थिए । बैठकमा वरिष्ठ नेता झलनाथ खनालले पार्टी पंक्तिमा छलफलै नगरी सरकार अगाडि बढ्ने प्रवृत्ति नरोके ठूलो दुर्घटना हुनसक्ने चेतावनी दिए ।

आजको बैठकमा नेता माधव नेपालले पनि धेरै बहस गरेनन् । उनले पनि यस्तो संवेदनशील विषयमा पार्टीभित्र गम्भिर छलफल हुनुपर्नेमा नगरिएको भन्दै आपत्ति प्रकट गरेका थिए । पार्टीका कार्यकारी अध्यक्ष पुष्पकमल दाहाल प्रचण्ड त आज केही नबोली बैठक सकियो । आजको बैठकमा नेता भीम रावलले धेरै प्रसंग उठाउन खोजेका थिए । तर बैठकमा एमसीसी कार्यान्वयनको चरणमा प्रवेश गरिसकेको तर्क गर्न थालिएपछि उनी पनि पछाडि हटे ।

आगामी असार १५ भित्र संसदबाट पास गराउनुपर्ने समयसीमा तोकिएको छ । सचिवालयको आजको बैठकले अब एमसीसी पास गर्ने आधार तयार भएको टिप्पणी ती नेताले गरेका छन् । एमसीसी पास गर्ने पक्षमा विपक्षी दलहरु नेपाली कांग्रेस र जनता समाजवादी पार्टी पनि रहेका छन् । त्यसैले पनि नेकपालाई समर्थन गर्न दवाव पर्नेछ – उनी भन्छन् ।