संविधान संशोधन प्रस्ताव संसदमा प्रस्तुत

१८ जेठ, काठमाडौं । भारतसँगको सीमा विवादपछि चर्चामा आएको नयाँ नक्सासहितको निशाना छाप परिवर्तन गर्न प्रतिनिधिसभाको आज बसेको बैठकमा संविधान संशोधनसम्बन्धी विधेयक पेश भएको छ । सरकारका तर्फबाट कानून तथा संसदीय व्यवस्थामन्त्री डा. शिवमाया तुम्बाहाम्फेले यस सम्बन्धी विधेयक प्रस्तुत गरिन् ।

उक्त संशोधन विधेयक उपर कसैको विरोध परेको छैन । नेपालको संविधानको धारा ९ को उपधारा २ मा नेपालको निशान छाप अनुसूची ३ मा उल्लेख भएबमोजिम नेपाल सरकारले हालै जारी गरेको राजनीतिक तथा प्रशासनिक नक्शा स्वीकृत गरी देशको वास्तविक सीमा प्रकाशन गरेकाले नेपालको संविधानको अनुसूची ३ को निशान छापभित्र अंकित नेपालको नक्शा मिलाउनुपर्ने भएकाले संशोधनका लागि यो विधेयक पेश गर्दछु– मन्त्री तुम्बाहाम्फेले प्रतिनिधिसभा बैठकमा प्रस्ताव पेश गर्दै भनिन् ।

यसअघि गत बुधबारको कार्यसूचीमा परेको यो प्रस्ताव एकाएक स्थगित भएपछि नेपाली राजनीतिक बृत्तमा विभिन्न खाले अड्कल गरिएको थियो । प्रमुख प्रतिपक्षी दल नेपाली कांग्रेस पनि यस सम्बन्धी प्रस्तावको पक्षका उभिन तयार भएपछि सरकारले आज फेरि प्रस्ताव दर्ता गरेकोे हो ।

कांग्रेसको हिजो बसेको केन्द्रीय कार्य समिति बैठकले संविधान संशोधनको पक्षमा दृढतापूर्वक उभिने निर्णय गरेको थियो ।नेपाली कांग्रेस प्रस्तावको पक्षमा उभिएपछि सो प्रस्ताव संसदमा दुई तिहाईले पारित हुनेछ ।

यस सम्बन्धमा अर्काे प्रतिपक्षी दल जनता समाजवादी पार्टी भने अझै अनिर्णित छ । यो संशोधनसँगै विगतदेखि आफूहरुले उठाएका माग पनि संबोधन गर्न उसले शर्त राखेको छ । तर प्रधानमन्त्री केपी ओली भने हाल यही मात्र संशोधन गर्ने पक्षमा रहेका छन् ।